Café profesional na casa? Si e non é tan difícil
Nun mundo tomado polas cápsulas o café reivindícase como o que é: unha bebida feita cultura. Hoxe é o seu día
Se cheira a café dá menos preguiza levantarse do mesmo xeito que dunha comida non te levantas ata que che tomas un. As pausas do traballo non serían o mesmo sen el e se non existise teriamos menos amigos porque que sería dese «Tomamos un café?».
Precisamente a iso, a tomar un café, fomos para pedir consello aos que máis saben. Así chegamos a Dispar Café, un pequeno espazo escondido nunha ruela da Coruña que vive por e para un produto que consenten desde o principio ata o final. Imos aprender a facer café pero non te preocupes porque non empezaremos a casa polo tellado: aquí lerás consellos para principiantes nun mundo que, seguro, seguiremos explorando.
«A miña historia co café empezou cando nacín. Crieime colleitando café en Colombia onde a miña familia se dedica a esa industria desde hai décadas», o que fala é Jean Z., dono de Dispar Café. Naceu en Nova York, criouse entre Estados Unidos e Colombia, estudou en Madrid e o amor tróuxoo ata A Coruña. Aquí coñeceu a un galego, Adrián L., ao que enganchou aos poucos: «A pausa do café sempre foi o meu momento favorito. Cando coñecín a Jean empezoume a embaucar, comecei a investigar, a engancharme e agora paso as miñas horas tostando e moendo café». Aquí só hai café especial de Colombia. O irmán de Jean selecciónao alí e envíao. «Chega en grans de cor verde (a xente non adoita saber que é desa cor) e aquí tostámolo e preparamos. Tostar é como cociñar, toda unha ciencia».
Pero, é posible preparar na casa un café de calidade sen gastarse un dineral en maquinaria e dispositivos difíciles de utilizar? «Claro que si. A clave está no café. Ten que ser fresco, de tempada, tostado nun tempo óptimo e o máis importante: que estea en gran», Jean dános a primeira lección así que tomade nota: nunca hai que comprar o café xa moído. «En canto moes o café só tarda entre quince e vinte minutos en oxidarse e, por tanto, en perder o 80% das súas propiedades». Así que o primeiro que necesitamos é un muíño, este é o primeiro salto para conseguir un café de calidade na casa.
Para principiantes: muíño de café manual Hario
Jean recoméndanos este muíño perfecto a nivel introdutorio. Para principiantes. «Un dos mellores en relación calidade-prezo, sen dúbida». As moas cónicas cerámicas de alta calidade moen os grans de café en partículas uniformes. Permite axustar o tipo de moenda, dosificar a cantidade e, o máis importante, é moi doado de usar.
Para profesionais: muíño de café C40 Nitro Blade de Comandante
Hai que dar opcións e esta é para un nivel máis avanzado. Un dos mellores, senón o mellor, muíño manual do mercado. Coa trituradora fabricada en aceiro inoxidable e unha tecnoloxía de triturado única, o muíño produce un moído extremadamente preciso e homoxéneo. O malo: o prezo. Primeiro practica co outro muíño e despois terás tempo para subir o nivel.
Unha vez moído o café necesitamos unha máquina para facelo e, para empezar (e seguir), non hai nada mellor que a clásica, mítica e sempre fiel cafeteira italiana.
Bialetti Moka Express
«É a cafeteira italiana orixinal cos materiais idóneos para a extracción do café», en Dispar Café non dubidan nin un momento cando lles preguntamos pola mellor cafeteira italiana. O deseño permaneceu practicamente inalterado durante 80 anos (foi patentada en 1933 en Italia) así que por algo será. A moka espress é o modelo máis clásico e un dos buques insignia da marca. O pero? Non serve para as vitrocerámicas de indución.
Este é o modelo pequeno, para dúas cuncas. Se queres unha Bialetti Moka máis grande esta é a túa opción.
Bo café, un muíño e unha italiana. Con eses elementos e estes dous consellos que te imos a dar xa non tes escusa para non preparar o mellor café na túa propia casa.
«Hai dúas cousas que case todo o mundo fai mal á hora de preparar un café nunha italiana», Jean vai corrixir eses erros garrafales:
- Non prequentar a auga: erro garrafal número un. Hai que pór a auga na cafeteira italiana cunha temperatura o máis próxima posible ao momento de ebulición.
- Deixar que o café se recueza: erro número dous. É moi doado, no momento no que se empezan a escoitar os primeiros ruídos hai que sacar a cafeteira do lume.
- Un consello máis: hai que axustar ben a moenda. O café non debería ser máis fino que o groso dos buracos do cacillo da nosa cafeteira.
E a partir de aquí que? En Dispar Café téñeno claro: «Logo todo é experimentar». E se hai alguén que queira empezar a experimentar xa? «O seguinte paso para nós sería este: a Dripper V60. Con este método ti mesmo vas filtrando o café, controlando a temperatura da auga que entra en contacto con el. O xeito na que a auga interactúa co café é crucial. Ás veces a xente non se dá conta de que toma un 95% de auga e só un 5% de café». Con estes produtos que enumeramos a continuación poderás comezar a experimentar e ir xogando coas receitas ao teu antollo: proba-erro para ir descubrindo e sacando o máximo partido a un bo café.
Cafeteira Dripper V60 de cerámica
Filtros de papel para Hario V60
V60 Drip Kettle Buono
O pescozo de cisne permite controlar con gran precisión a localización e o fluxo de auga que vertemos sobre o noso café.
Xerra de cristal Hario
