Choque múltiple nunha granizada preto de Monforte: tres feridos e tres coches implicados
SOBER
Dous dos coches atopáronse a saraiba á saída dunha curva
15 abr 2025 . Actualizado á 18:49 h.Tres persoas resultaron feridas nunha ponte preto de Monforte este martes pola tarde nun choque múltiple provocado por unha granizada. Dous turismos chocaron de fronte e un terceiro saíuse da calzada no tramo da N-120 que pasa polo municipio de Sober e a oito quilómetros do centro urbano de Monforte. Nese momento xa non granizaba, pero acababa de facelo e o firme estaba impracticable. «Non é que esbarasen os coches, é que esbarabas ti só con pór o pé no chan», di un dos implicados no sinistro.
O accidente rexistrouse nunha xornada de choivas en ocasións intensas e de granizadas localizadas. A que provocou este accidente caeu ás tres e cuarto da tarde e afectou a pouco máis de cen metros da estrada N-120, na ponte sobre o río Cabe xunto á vila de Canaval. Dous dos vehículos implicados, unha furgoneta e un turismo, circulaban en dirección Ourense. O terceiro, outro coche, viña en sentido contrario.
Os dous turismos chocaron frontalmente, deixando feridos o condutor dun deles e aos dous ocupantes do outro. Os dous vehículos sufriron importantes desfeitas na súa parte frontal. A persoa que ía na furgoneta saíu ilesa do contratempo, pero o seu automóbil sufriu golpes tanto na parte frontal como na traseira.
O condutor da furgoneta é David Álvarez, que viña da Rúa e circulaba en dirección a Cangas, que é onde vive. Conta que non só xa non granizaba cando tivo lugar o accidente, senón que no sentido en que el circulaba era imposible ver como estaba a calzada ata estar amais: «Vino ao saír dunha curva e antes a calzada estaba limpa -explica-, cando me quixen dar conta estaba amais da sarabia».
Un dos condutores que chegaron ao lugar xusto despois do accidente, un garda civil de tráfico que estaba fose de servizo, púxose a dirixir a circulación dando paso alternativamente aos vehículos que se detiveron a ambos os dous lados. Cando chegaron os seus compañeiros do destacamento de tráfico de Monforte, tomáronlle a vez. Outra condutora detívose e abriu o seu coche a unha das persoas feridas mentres chegaba a axuda.
Ao lugar foron enviadas dúas ambulancias do 061. O persoal sanitario atendeu os feridos sobre o terreo e despois trasladounos nas ambulancias ao hospital de Monforte.