O futbolista soberino Pablo Pérez foi un dos protagonistas da selección galega de fútbol sub-16 no campionato por autonomías que se acaba de disputar en terras gaditanas. O combinado autonómico conquistou a súa clasificación para a fase final, que se xogará en abril.
Galicia empatou (2-2) co combinado de Aragón e con Asturias (1-1), e endosoulle un contundente 11-0 a Melilla. Estes resultados déronlle o pasaporte para esta fase final.
Pablo mostra a súa satisfacción polo feito de ter tido protagonismo no equipo galego. Foi titular nos dous primeiros partidos, e no terceiro saíu desde o banco. «Estou moi contento de ter representado a Galicia. Estar nun campionato destas características é unha motivación, unha aprendizaxe e un escaparate perfecto, porque aí están moitos observadores de grandes clubs», sinala o futbolista soberino.
Coa selección galega, Pablo xogou de central, unha posición que xa é habitual desde que fichou o pasado verán polo Real Club Celta . A nova promesa de 16 anos agarda estar con Galicia na última fase.
Un paso adiante
O pasado verán, Pablo Pérez, deu un salto importante na súa carreira. O xogador, que se formou no Calasancio e pasou polo Pavillón, estampaba a súa firma polo Real Club Celta .
A experiencia estalle resultando frutífera, xa que ata o momento foi titular en todos os partidos que disputou o seu equipo. «Estou moi contento. Aquí hai máis nivel, é máis entretido e estase moito máis en contacto coa pelota. Hai moita máis competitividade e gózase máis. De verdade, estou moi motivado», afirma o xogador soberino.
Pablo Pérez forma parte do equipo cadete do Celta que compite na División de Honra. «Estamos no segundo posto, a seis puntos do Dépor, porque empatamos algúns partidos, que nos penalizaron. O obxectivo é gañar a liga, e considero que podemos facelo. As próximas xornadas serán claves», asegura.
O futbolista de Sober adéstrase na Cidade Deportiva da Madroa e neste escenario disputa os partidos o seu equipo. Hai uns días, o cadro de persoal recibiu a visita de Gabri Veiga, un exemplo para a canteira celeste. «O meu obxectivo e o meu soño sería debutar algún día en Balaídos co primeiro equipo do Celta », conclúe o mozo xogador soberino.