Manuel Isorna, psicólogo: «As condutas adictivas rexístranse en idades cada vez máis baixas»

O instituto de ensino medio de Quiroga acollerá o próximo día 13 unha charla sobre as condutas adictivas en adolescentes a cargo de Manuel Isorna Folgar, profesor do departamento de Análise e Intervención Psicosocioeducativa da Facultade de Ciencias da Educación da Universidade de Vigo. Investigador e experto en prevención escolar e comunitaria, Isorna xa ten impartido anteriormente outras charlas deste tipo en diferentes centros educativos de Galicia dentro dun ciclo promovido pola universidade viguesa. O psicólogo sinala que o obxectivo destas sesións é abordan as condutas que están relacionadas co consumo de substancias —como o alcohol e diversos tipos de estupefacientes— e as que non o están, como son as adicións ao xogo ou ao uso das redes sociais.

—Estanse notando moitos cambios no que respecta ás condutas adictivas na xente nova?

—Os cambios que se notan agora consisten por un lado en que estas condutas se están rexistrando a idades cada vez máis baixas. E por outro, en que cada vez afectan máis ás mulleres. No que respecta aos homes, curiosamente, os datos non se incrementan pero tampouco se reducen, mentres que estas condutas cada vez están tendo máis incidencia entre as mulleres.

—Que porcentaxe de poboación está hoxe afectada por estas condutas?

—Segundo as investigacións actuais, as condutas aditivas supoñen un problema para un 30% da poboación. Isto engloba todo tipo de condutas, tanto con substancias como sen elas.

—Independentemente da franxa de idade?

—Estes problemas poden afectar por igual a xente de todas as idades. Ao longo da súa vida, unha de cada tres persoas corre o risco de caer nalgún tipo de conduta adictiva. Moita xente consume alcohol, pero os que poden chegar a sufrir unha adicción son un 30%. Pasa o mesmo co tabaco, os que acaban sendo fumadores crónicos supoñen esa porcentaxe. E tamén coas adiccións relacionadas con Internet e as redes sociais. Aínda que moita xente ten acceso a estas tecnoloxías, o risco de condutas adictivas é similar. En todos os casos é igual, a porcentaxe de poboación afectada é sempre arredor dun 30% Os problemas que poden crear estas condutas son múltiples, de tipo sanitario, familiar, laboral...

—Hoxe hai máis posibilidades de caer en adicións?

—En canto ao xogo, o problema é que antes estaba limitado a certos espazos, como os casinos, pero coas tecnoloxías actuais hoxe en día é posible xogar e apostar en calquera momento e en calquera lugar. E tamén sucede que algunhas substancias que poden xerar condutas adictivas son agora máis potentes, como ocorre o cannabis, que antes podía conter máis ou menos un 5% de THC [alcaloide de efectos psicoactivos], pero na actualidade pode chegar a ter un 20% ou un 25%.

—Na actualidade estase prohibindo o uso de teléfonos móbiles nos centros educativos.

—En principio nestas charlas non está previsto abordar esta cuestión concreta, a non ser que os asistentes fagan algunha pregunta a ese respecto. Penso que o problema co uso dos móbiles é que a través deles pódese acceder a Internet e ás redes sociais, e que a xente nova tamén pode entrar facilmente en videoxogos ou webs pornográficas, facendo que haxa máis risco de caer en condutas adictivas. Un móbil sen conexión a Internet non ten por que supor un problema serio.

—En que consiste o programa no que se encadran estas charlas?

—É un ciclo organizado pola Universidade de Vigo que non se limita á divulgación sobre as condutas adictivas. Tamén falamos aos alumnos de secundaria sobre o que se fai na universidade e os estudos que poden cursar despois, para que teñan as ideas máis claras e máis información á hora de escoller. A universidade ofrece estas actividades e son os responsables dos centros educativos os que demandan o que máis lles pode interesar.

---

---

---