A ponte do Saviñao que arrastrou o río repararase ano e medio despois
O Saviñao
As obras para reabrir a estrada de Ourigo non poderán comezar antes do verán
15 feb 2024 . Actualizado ás 05:00 h.Algo máis dun ano despois de que se derrubase como consecuencia dunha crecida, a Confederación Hidrográfica do Miño-Sil saca a concurso as obras de reposición da ponte sobre o río Portiño, situado no lugar de Ourigo, dentro do termo municipal do Saviñao . O orzamento de partida para a adxudicación é de 119.900 euros e o prazo para a realización do proxecto de tres meses a partir da firma do contrato. A mesa encargada de elixir a proposta máis vantaxosa reunirase con posterioridade ao peche do prazo de presentación das ofertas, que permanecerá aberto ata o vindeiro luns 19 de febreiro.
A crecida do día de Ano Novo do 2023 levou por diante a ponte situada nese enclave da parroquia da Broza e unha parte da estrada que atravesaba o río. Tras o derrumbe, a confederación expuxo ao Concello do Saviñao a firma dun acordo para financiar as obras de forma conxunta. A demarcación hidrográfica puxo sobre a mesa esta fórmula por entender que era a adecuada para a reposición do viaduto e o tramo do viario afectado, cuxa titularidade é municipal.
O convenio que asinaron no seu momento ten un importe total de 150.000 euros e a achega con cargo ao orzamento municipal ascende a 30.000 euros. «O derrube terá uns vinte metros de longo e seis de profundidade. Foron días de moita choiva e posiblemente a riada arrastrase algún tronco grande que acabou por atrancar a ponte e provocou que se formara nela unha gran bolsa de auga», apunta o alcalde do Saviñao, Carlos Armesto.
As choivas descargaron con forza e sen interrupción entre o 31 de decembro e o primeiro día do ano do 2023, xornadas nas que se rexistraron importantes crecidas en todos os ríos do sur de Lugo e algúns desbordamentos. Na área formada polos municipios de Chantada , O Saviñao e Pantón producíronse as precipitacións máis intensas. Foi un particular que circulaba por alí o que alertou entón a Emerxencias de Galicia da caída da ponte do río Portiño ao tropezarse co derrumbe de parte da estrada.
Un rodeo por Aiaz
Segundo informa o Concello do Saviñao, o pobo máis próximo ao lugar do derrubamento é Ourigo e conta na actualidade con dúas únicas casas habitadas. Os veciños non quedaron incomunicados debido á caída da ponte, pero deben dar un rodeo dun quilómetro e medio aproximadamente polo núcleo de Aiaz para conectar coa estrada principal que enlaza con Escairón, capitalidade do municipio. A conexión era directa a través do viario municipal que agora permanece cortado.
O Portiño é un afluente do río Sardiñeira e non adoita levar un gran caudal salvo no inverno. As obras de reparación non puideron levar a cabo o pasado verán e agora que puideron licitarse haberá que agardar á estiaxe para derivar a canle e poder realizar os encofrados sen problemas. As actuacións previstas no proxecto non implican a realización de expropiacións, xa que os terreos necesarios para a execución das obras serán postos a disposición da Confederación Hidrográfica do Miño-Sil polo Concello do Saviñao. Tampouco existen servizos afectados pola execución dos traballos de reposición da estrutura e o viario.
Unha crecida que tamén causou danos no paseo fluvial de Monforte
As abundantes precipitacións que descargaron case sen tregua durante os meses de novembro e decembro do 2022 e que tiveron continuidade nos primeiros días de xaneiro do 2023 dispararon os caudais das canles fluviais da demarcación hidrográfica do Miño-Sil. O colapso do viaduto sobre o río Portiño foi unha das moitas consecuencias que trouxo consigo aquel tren de borrascas, que en Monforte tamén provocou cuantiosos danos na presa da Pinguela e o tramo anexo do paseo fluvial do Cabe.
A obra da ponte sobre o arroio Portiño estaba formada por unha tubaxe de aceiro galvanizado que canalizaba a auga. O paso dos anos e a acción das augas de características acedas do río provocaron a diminución progresiva da súa resistencia, segundo o diagnóstico das causas do colapso que realizaron os técnicos da demarcación hidrográfica. A súa recomendación, por outra banda, é que as obras de reposición da estrutura desenvólvanse entre os meses de xuño e setembro, por ser a época do ano con menores precipitacións.
Desviación da canle
O proxecto construtivo contempla operacións de acondicionamento de camiños provisionais de acceso; troceado e retirada das árbores e troncos arrastrados pola corrente e acumulados na canle; e demolición e retirada dos restos das embocaduras de formigón e do tubo de aceiro galvanizado da antiga obra de paso. Para a execución dos traballos destinados ao Saviñao será necesaria a desviación provisional da canle a través dunha tubaxe.