Os traballadores do parador de turismo de Monforte protestan polas súas condicións salariais

Traballadores do parador de turismo de Monforte participaron este venres nunha concentración de protesta polo bloqueo da negociación do convenio colectivo. Os representantes do persoal levan catro anos tratando sen éxito de negociar un novo acordo coa dirección. A persoal ameaza con medidas máis contundentes e denuncia que a empresa parece apostar por «deixar pasar o tempo agardando que o conflito se dilúa e eludir a súa responsabilidade».

Protestas como a de onte en Monforte celebráronse na maioría dos paradores nas diferentes comunidades autónomas. Os representantes dos traballadores do Parador de Monforte denuncian que sen novo convenio as súas condicións laborais son precarias, con «salarios ridículamente insuficientes e unha conciliación familiar inviable debido á extrema flexibilidade, as quendas rotativas e, especialmente, a quenda partida ,o máis habitual no departamento de comedor e cociña, que normalmente se estende durante catro horas pola mañá e tres horas e media pola tarde-noite, incluíndo fins de semana e festivos».

O persoal reivindica «salarios xustos cos que o persoal poida chegar a fin de mes e vivir dignamente, implantación definitiva e dunha vez por todas do plan de pensións, desenvolvemento profesional, estabilidade no emprego, xornadas parciais mínimo garantidas, melloras na xestión da incapacidade temporal, xubilacións parciais, redución progresiva de xornada e unha planificación anticipada de quendas que permita unha conciliación real».

Estas protestas chegan ademais nun contexto de bos resultados económicos para esta cadea hoteleira. Este verán, a rede de establecementos desta empresa pública incrementou un 2% os seus beneficios este verán e tivo unha ocupación media do 86%, que chegou ao 94% nalgunhas comunidades autónomas.

---

---

---