O PP critica as expectativas excesivas sobre o centro de ciberseguridade
MONFORTE DE LEMOS
Katy Varela lembra que este ano debería ter 40 traballadores e en cambio só son 10
07 ago 2025 . Actualizado á 18:51 h.Representantes do Partido Popular reuníronse esta semana en Monforte con traballadores de LogiRail, a empresa que Renfe subcontrata para servizos como os centros de competencias dixitais. O persoal desta empresa leva meses mobilizándose para mellorar as súas condicións laborais. O PP acusa o alcalde de Monforte de crear expectativas esaxeradas con respecto ao centro de competencias dixitais aberto por Renfe no 2023 en Monforte, que está especializado en ciberseguridade.
Tras a reunión co persoal de LogiRail, o deputado no Congreso Francisco Conde e as deputadas autonómicas Katy Varela e Raquel Arias reprocharon ao alcalde monfortino, José Tomé, que no seu momento anunciase que o centro de ciberseguridade ferroviaria de Monforte acabaría creando 100 postos de traballo directos e que o seu persoal estaría formada por 40 traballadores no 2025. «En realidade só hai dez traballadores, e cobrando menos e en condicións máis precarias que os traballadores de Renfe realizando tarefas similares».
Katy Varela, que ademais é portavoz municipal do PP, lembrou ademais que o alcalde non quixo apoiar a moción que presentaron no último pleno municipal en defensa das reivindicacións de melloras laborais para os traballadores do centro de ciberseguridade de Monforte e para o resto do persoal de LogiRail.