A Deputación organiza un ciclo de visitas guiadas gratuítas a lugares situados fóra dos circuítos turísticos habituais
06 jun 2025 . Actualizado á 18:01 h.Nove lugares especiais repartidos por diferentes municipios da provincia lucense forman parte da primeira Semana do Patrimonio Invisible, un ciclo de visitas guiadas gratuítas que organiza a Vicepresidencia da Deputación. O programa foi presentado por Iria Castro, responsable da área de Cultura do organismo provincial; a xerente da Rede Museística da Deputación, Encarna Lago; a directora do Museo Provincial de Lugo, Aurelia Balseiro, e o responsable de coordinación de actividades, César Abella.
Segundo indican desde a Deputación, esta iniciativa «ofrece á cidadanía unha oportunidade única de descubrimento de lugares fóra dos circuítos turísticos convencionais a través de visitas guiadas en grupos reducidos». Con este ciclo de visitas, apuntou Iria Castro, preténdese visibilizar «diferentes espazos, fomentando o coñecemento e a valorización da diversidade patrimonial da provincia e sensibilizando sobre a importancia da protección e conservación do patrimonio».
As visitas da primeira edición deste programa levarán a cabo os próximos días 7, 8, 14 e 15. Para participar nestas actividades é preciso realizar unha inscrición previa a través da plataforma web patrimonioinvisible.gal. As reservas pódense efectuar a partir das doce do mediodía deste xoves. As visitas están deseñadas para grupos reducidos dun máximo de 15 persoas para garantir —sinalan os organizadores— «un tratamento próximo e de calidade e unha inmersión profunda en cada localización». As prazas dispoñibles son 400 en total.
A continuación especifícanse os lugares que se poderán visitar nesta primeira edición:
Presa de Belesar (Chantada). Na visita, dirixida ao público non especializado, poderanse coñecer instalacións do grande encoro hidroeléctrico que normalmente non están abertas as visitas turísticas.
Ferrería de Penacova (Bóveda). Esta antiga fábrica de ferro é unha das mostras mellor conservadas da industria siderúrxica artesanal que existiu no territorio lucense entre os séculos XVI e XIX.
Iglesia de Hospital (O Incio). Un templo románico enteiramente construído en mármore que pertenceu á antiga Encomenda de Quiroga.
Mosteiro de San Vicente (Monforte). O edificio do antigo convento benedictino de San Vicente do Pino foi transformado en parador no 2003. Na visita poderase visitar a súa grande igrexa, restaurada nos últimos anos, e tamén as instalacións do parador.
Pazo de Ferreiroá (Pantón). De propiedade particular, é un dos exemplos máis notables da arquitectura residencial da antiga fidalguía rural do sur da provincia.
Seminario de Santa Catalina (Mondoñedo). Un percorrido polo maior edificio da localidade permitirá coñecer a súa historia e a súa singular biblioteca.
Mosteiro de San Salvador (Lourenzá). A visita á igrexa do convento combinarase con outros espazos menos coñecidos, como o claustro e a cociña.
Mananciais de Mondoñedo. Os visitantes poderán coñecer galerías subterráneas e acuedutos que conducen a auga ao centro histórico da localidade.
Cueva de Santalla de Lóuzara (Samos). Unha cavidade natural con formacións cársticas pouco coñecida para o turismo.