O coche da vítima quedou esnaquizado e os bombeiros tiveron que arrincar o teito para rescatalo
05 abr 2025 . Actualizado á 14:14 h.Unha persoa resultou ferida moi grave nun accidente de tráfico ocorrido esta mañá no municipio de Bóveda. No suceso víronse implicados dous coches. Os bombeiros tiveron que intervir para sacar á vítima dos restos esnaquizados do seu vehículo. O suceso rexistrouse na vía de alta capacidade CG-2.2, que une Monforte e Lugo.
O accidente tivo lugar pasadas as doce do mediodía nas proximidades da saída que comunica esa estrada con Bóveda. Trátase dun tramo practicamente recto e no que hai boa visibilidade.
O coche no que ía a persoa que resultou gravemente ferida quedou practicamente esnaquizado polo impacto. Tanto que quedou atrapado dentro do vehículo e para sacalo tiveron que intervir os bombeiros de Monforte. Utilizaron unha máquina de cortar carrocería coa que levantaron por completo o teito do coche para poder así evacuar á vítima.
O ferido recibiu asistencia de urxencias sobre o terreo por parte do persoal dunha ambulancia do 061 enviada ao lugar do accidente desde Monforte. Despois foi trasladado a un hospital.
O segundo turismo implicado sufriu o golpe na súa parte frontal, que quedou esmagada por completo. Con todo, o habitáculo dos viaxeiros resistiu ben o golpe e non aparentaba sufrir moitos danos.
A Garda Civil de tráfico cortou por completo á circulación ese tramo do corredor de Monforte a Lugo mentres duraron os traballos de asistencia ás vítimas e de retirada dos coches.