A Garda Civil esclarece a causa do incendio de 1.100 hectáreas na Pobra do Brollón e Quiroga: empezou por unha roza
A POBRA DO BROLLÓN
Denunciado o responsable destes traballos forestais, un veciño da Pobra de 53 anos
26 sep 2025 . Actualizado á 20:23 h.A Garda Civil ten identificada a unha persoa como sospeitosa de provocar o incendio que a finais de agosto queimou máis de 1.000 hectáreas na Pobra do Brollón e en Quiroga. Trátase dun veciño da Pobra do Brollón que ten 53 anos e que provocaría as chamas de forma accidental, cando facía traballos de roza. O home está a ser investigado por un delito de incendio forestal.
Aquel incendio empezou á primeira hora da tarde do 25 de agosto nas proximidades de Golmar, unha aldea da Pobra do Brollón. Desde este pobo, que se atopa na parroquia de Abrence, as chamas avanzaron con moita rapidez cara ao leste e o sur e en moi pouco tempo acadaron o veciño municipio de Quiroga. Nos tres días seguintes, o incendio queimou ao redor de 1.100 hectáreas ao redor do tramo final do río Lor, e incluso chegou a saltar alén do río Sil, no municipio de Ribas de Sil, pero ese brote foi apagado en pouco tempo.
As investigacións iniciadas o mesmo 26 de agosto pola Garda Civil levaron a cabo especialistas do denominado equipo multidisciplinar de investigación de incendios forestais deste corpo, o EMIIF.
Segundo a información facilitada este venres polos portavoces da comandancia da Garda Civil en Lugo, os axentes encargados da investigación empregaron «novas tecnoloxías aplicadas á investigación das causas dos incendios forestais» e en pouco tempo chegaron á conclusión de que o «o incendio iniciouse debido aos labores de roza realizadas nunha pista por maquinaria agrícola».
A maioría son imprudencias
Na Garda Civil explican que os sospeitosos investigadas en Galicia no que vai de ano pola súa posible relación este tipo de delitos son na súa maioría persoas que cometeron imprudencias no manexo do lume ou de maquinaria agrícola, sen intención aparente de provocar ningún incendio.
As imprudencias teñen que ver na súa maioría con incumprimentos das normas impostas para a realización de queimas ou de traballos forestais.