O PP acusa o alcalde de alimentar a confusión e pídelle que se vaia
22 dic 2025 . Actualizado á 19:35 h.Ata o próximo pleno non quedará resolta a incógnita de se os concelleiros socialistas tomarán a mesma decisión que o alcalde de Monforte, José Tomé, que pediu a súa suspensión de militancia no partido a raíz das acusacións por presunto acoso sexual. Tomé declinou abordar esa cuestión este luns nas dúas comisións informativas previas á sesión que terá lugar o 29 de decembro. «As comisións son para tratar asuntos do pleno, non a situación política do Concello», sinalou a este diario. Pola súa banda, o portavoz do PP, Katy Varela, afirmou recibir nelas un trato «bordo e desagradable» por parte de Tomé.
As comisións de facenda e asuntos do pleno celebráronse á primeira hora da mañá. Nada máis rematar, o PP convocou unha rolda de prensa na sede local para censurar a negativa do alcalde para dar as explicacións que se lle solicitaron. Katy Varela criticou ademais o trato que lle dispensara na primeira das dúas comisións. «Atacoume de maneira inxustificada, facendo comentarios sobre a miña lingua e dicíndome que tiña que controlala, cuestionando por que preguntábamos pola situación do grupo socialista. Tanto a cidadanía como os concelleiros temos dereito a saber en que situación real se atopa o Concello», declarou o portavoz dos populares.
Consultado respecto diso, Tomé negou ter unha mala actitude cara á concelleira do PP. «O que lle dixen foi ‘teña coidado coa lingua', porque hai que controlar o que se di non vai ser que non sexa verdade», precisou. «En política —engadiu— non vale todo, non se pode dar por feito algo que non é verdade. Un debería ser inocente, e non culpable, mentres non se demostre o contrario». O alcalde —que abandonou a presidencia provincial, aínda que segue de deputado— insistiu en que non pensa dimitir no Concello e negou que exista «unha crise institucional» a nivel municipal. «Vou seguir como alcalde porque hai proxectos en marcha moi importantes para Monforte», recalcou.
Visións contrapostas
Segundo a súa valoración, a «denuncia falsa» da que se fixo eco un programa televisivo non afecta a un goberno municipal «unido e sólido». A visión do sucedido é moi diferente para o PP, que levará ao último pleno do ano unha moción instando a Tomé a que dimita a cargo do Concello. «Despois do grave escándalo de suposto acoso sexual pola súa parte contra seis mulleres continúa exercendo como alcalde, pero debería dar un paso atrás como rexedor municipal e entregar a acta», manifestou Katy Varela. «Esta persoa —subliñou— non pode seguir nin un minuto máis á fronte da alcaldía, polo ben da imaxe da cidade, da institución e da súa propia credibilidade».
Tomé dixo na comisión informativa que os concelleiros do equipo de goberno que participaron nela estaban alí en representación do grupo socialista, polo que polo menos de momento non se consumou a súa posible renuncia de militancia e a súa conversión en non adscritos. «Non sabemos se se incluía el mesmo como membro do grupo socialista, pero parécenos unha auténtica tomadura de pelo que non aclare a situación real na que se atopa o goberno local e o propio Concello», denunciou Katy Varela nunha rolda de prensa na que censurou ao BNG por non levar ao pleno unha solicitude de dimisión do alcalde.
O BNG lembrou onte a través dunha nota de prensa que foi o primeiro partido en pedir que Tomé deixase tamén a alcaldía de Monforte. «As declaracións do PP só poden explicarse desde o nerviosismo e o carroñerismo político, ao ver neste episodio desafortunado para a política e para a veciñanza de Monforte a súa única oportunidade de aparentar unha oposición que non foi quen de exercer durante toda a lexislatura», sinalan os nacionalistas na súa resposta ao PP.