As comarcas que atravesa a estrada Lugo-Ourense reclaman investimentos
03 feb 2022 . Actualizado á 17:09 h.A confirmación de que o Ministerio de Transportes non ten plans para seguir construíndo os tramos lucenses da autovía Lugo-Ourense provoca frustración entre axentes sociais e concellos das comarcas de Chantada e Lugo polas que pasa a estrada N-540. Os consultados reclaman ademais ao ministerio que cumpra coas súas promesas e invista o necesario para evitar a deterioración da N-540.
«Se non van facer nada coa autovía tampouco é de recibo que a N-540 estea non estado bochornoso non que está», resume o empresario chantadino Miguel Areán. Na mesma liña, o alcalde de Carballedo, Julio Yebra, apunta que o tramo entre Chantada e A Barrela xa necesita unha reparación, a pesar de que foi obxecto dunha intervención de urxencia hai menos de catro anos. «Eu penso -afirma o alcalde- que daquela non se gastou nesas reparacións nin a metade do que estaba previsto».
A alcaldesa de Guntín tamén se refire ao estado en que se atopa a estrada nacional. «Non sei -di María José Gómez- que fixemos vos de Lugo para que nos traten así». Esta alcaldesa recoñece que pode chegar a entender que se aparque a construción da autovía, «pero polo menos que nos amañen a estrada nacional, temos dereito a ter unha estrada decente».
En calquera caso, a alcaldesa anunciou que este xoves levarán á Subdelegación do Goberno as firmas que recolleron no seu municipio reclamando a mellora da N-540. A travesía de Guntín é un dos lugares con máis fochancas do trazado ata Ourense, aínda que María José Gómez tamén destaca o mal estado do alto do Hospital. «Xa sei que hai proxectos e máis promesas de mellora para a N-540, pero por favor que boten unha capa de rodaxe para que se poda circular e non deixar as rodas na estrada».
En canto ao resto das autovías pendentes, a alcaldesa de Guntín reclama que se acabe coa maior rapidez posible a A-54 de Lugo a Santiago.
A maior parte dos alcaldes que en setembro do ano pasado estiveron na inauguración do por agora único tramo dispoñible da A-56 xa saíron do acto coa sensación de que no Ministerio de Transportes non hai ningunha intención de rematar de construír o que falta desta autovía na provincia de Lugo. Naquel acto, o secretario xeral de Infraestruturas, Sergio Vázquez, dixo que en materia de estradas as prioridades en Lugo pasaban por rematar dunha vez a autovía Lugo-Santiago. As súas declaracións só deixaban entrever que os seguintes tramos da A-56 nos que quizais se investise diñeiro serían os de Ourense.