Tempo de ler, tempo de lecer. Veñen algo máis de dúas semanas de vagar e, aínda que as previsións do tempo non sexan malas de todo, os días son curtos e quizais estean cheos de actividades en familia. Non sería raro que moitos teñades unha morea de horas libres que non saibades como encher. Pois La Voz de la Escuela acode na vosa axuda con esta proposta de libros de Nadal. Para todas as idades, desta volta con preferencia pola ficción e sempre co pano de fondo da actualidade.
19 dic 2018 . Actualizado á 05:00 h.As miñas PRIMEIRAS PALABRAS. BUSCA E ATOPA
Alberto Díaz. Anaya, 2018
Prelectores
Álbum en formato cartón para iniciarse no dominio de vocabulario tanto en castelán como en inglés. Agrupadas en doce temas próximos ás súas vivencias, cada un ofrece oito palabras e as súas correspondentes ilustracións en cor. Exemplo para «Granxa»: cabalo, vaca, porco, granxeiro, galiña, ovella, tractor, celeiro.
A VACA DIXO MUA
Gloria Sánchez. Ilustracións de Teresa Bellón. Oqueleo, 2018
A partir de 7 anos
Os habitantes dunha aldea perden as cinco vogais. Levounas un home tocando a tuba. Non se entenden e por iso Ada, una nena que falaba coas mans e mirada, saíu na súa procura e recuperounas: un rato deulle o i, o bufo o u, a ovella o e, a galiña o o e unha vaca o a. Ilustracións en cor en todas as páxinas: sinxelas e divertidas coma a historia mesma. Hai versión en castelán.
PORQUE TE QUERO MOITO
Milja Praagman. Hércules, 2018
De 0 a 12 anos
É un álbum en grande formato ilustrado pola propia autora que narra unha tenra e sinxela historia que trata da relación entre unha neta e a súa avoa durante un paso pola cidade. O descubrimento do mundo que a rodea é explicado pola avoa de Ibi, que só ten ollos para a súa neta.
ÉRASE UNHA VEZ UN BOSQUE MÁXICO
Cris Riddell. Traducido por Elena Gallo. Edelvives, 2018
A partir de 9 anos
A nena Capa de Choiva Verde vaise topando, camiño dunha festa organizada por Rapunzel, con personaxes míticos como Caperucita, os tres cerditos, os sete ananiños… Todos reencóntranse na celebración, na cal Caperucita non ten inconveniente en bailar co lobo, e a bela en demostrar o seu amor á besta. Relato desmitificador, con portada e primeira páxina acuñadas. Especial atención merecen as ilustracións barrocas en cor, dignas de enmarcar.
CÁMBIACHE O CONTO!
Pedrés & Chinto. Xerais, 2018
Non lle podía acaer mellor o título, escrito ao vesre, a este libro de contos. Porque diso se trata: de partir dos clásicos de Andersen, Perrault ou os irmáns Grimm e darlles outro percorrido e outro final. Así, ninguén é quen semella na historia de Carrapuchiña Vermella, e a leiteira tivo a sorte de tropezar con… E todo isto cóntannolo cos inimitables debuxos da parella de humoristas imprescindible de La Voz.
UF! VAIA PEIDO... SERES SORPRENDENTES CON NOMES BEN OCORRRENTES
Luisa Martínez Lorenzo. Galaxia, 2018
A xente tenche cada cousa… Peidos de lobo, mazaleites, cagón, quimacasas… son algúns dos seres, tanto animais coma plantas, que podemos atopar na flora e na fauna que nos arrodea: seres próximos con nomes familiares. Non é este un libro de filosofía, aínda que fala da lanterna de Aristóteles. É un libro sobre a natureza tratada con doses de humor disparatado para explicar eses nomes e curiosidades relativas a eses seres, acompañados de debuxos... algúns un pouco fedorentos. Para rir e para entender.
PROXECTO AVOÍÑA
Anne Fine. Traducido por Xesús Fraga. Nórdica Infantil, 2018
Para apuntar este libro o máis doado é empezar por dicir que a súa autora é a nai da señora Doubtfire, ese papel memorable que representou no cine o estrañado Robin Williams. E esa non é a única das máis de 70 novelas infantís ou xuvenís da autora levadas á gran pantalla. Humor amable, pero sen rehuir a reflexión sobre temas comprometidos, para relatar como llas enxeñan Iván, Sophie, Tanya e Nicholas para que os seus pais non leven a un residencia a unha avoa que vive xa un pouco despistada. Proxecto Avoíña é un relato revestido de liberdade creativa e, sobre todo, dunha axilidade textual trepidante grazas aos abundantes diálogos.
QUERES SER XORNALISTA? TODO O QUE TES QUE SABER... Ou CASE
María Solar e Luis Fraga. Prólogo de Sandra Golpe. Siruela, 2017
O primeiro capítulo deste libro é unha invitación para iniciarse no xornalismo de forma autodidacta: sae máis barato case que non facer nada, porque cun blogue, ou algunha ferramenta parecida, e as ganas é suficiente para arrincar. Nos capítulos sucesivos, explícanse as claves do oficio nos seus moi diversas facetas: tanto o escrito como o audiovisual, e sobre o dixital e o multiplataforma, pero tamén noutras facetas como a da comunicación de empresa. Un dos capítulos dedícase á ética do profesional e o último á súa capacidade para cambiar o mundo, a través do exemplo de Felipe Suárez e a súa particular guerra radiofónica contra o narcotráfico en Galicia.
TONECHO
Xaquín Marín. Galaxia, 2017
Tonecho é o personaxe creado por Xaquín Marín para Golfiño, a revista infantil de editorial Galaxia que viu o seu primeiro número en xaneiro do ano 2000. Nunha segunda etapa, foi un suplemento de La Voz entre os anos 2002 e 2004. Marín segue a colaborar acotío en La Voz con ese estilo do debuxo tan característico, pero sobre todo con ese humor retranqueiro de aparencia inxenua que non agocha o sentido crítico con quen asoballa o máis débil.
A TORRE
Antonio Sandoval. Tradución de Xesús Fraga. Kalandraka,2018
Quen veña seguindo ao autor nas súas colaboracións en La Voz de la Escuela percorrerá as liñas de A torre cunha sensación de familiaridade. É o seu estilo inconfundible, de descricións minuciosas salpicadas de historias e reflexións, desta volta coa torre de Hércules e os seus arredores como fío condutor, pero sen traizoar o tema inevitable da necesidade de recuperar a conexión coa natureza. Imprescindible para amantes da natureza, pero tamén é unha invitación aos coruñeses para que recuperen o contacto con este espazo singular.
As MOZAS SON GUERREIRAS. 26 REBELDES QUE CAMBIARON O MUNDO
Irene Cívico, Sergio Parra. Ilustracións de Núria Aparicio. Montena, 2018
A partir de 11 anos
26 rebeldes citadas por orde cronolóxica, desde Hipatia de Alexandría, nacida cara ao ano 355 en Exipto, a primeira científica (matemática, filósofa e astrónoma), ata Malala Yousafzai (1997, Paquistán), a persoa máis mozo que obtivo o premio Nobel da Paz. E Marie Curie, Virginia Woolf, Clara Campoamor, Agatha Christie, Simone de Beauvoir, Jane Goodall, Valentina Tereshkova, Lady Gaga… De todas inclúese, á parte da reseña biográfica, o seu maior logro, a súa lema e un «Cópialle».
ESTA MOZA É DIFERENTE
J. J. Johnson. SM, 2018
A partir de 15 anos
A Evie coñécena no instituto como a hippy apestosa, entre outros insultos. Pero ela non quere ser unha alumna floreiro, porque «é mellor ser unha tola que pusilánime», e comprométese a loitar pola dignificación da institución, contra as inxustizas, a pesar de todos os obstáculos aos que ten que facer fronte. Cada un dos seus 34 capítulos empeza cunha cita, (desde Mark Twain ata Paolo Freire ou Albert Einstein: «A verdade faravos libres, pero antes esnaquizaravos», «O poder sen sabedoría é a quintaesencia da arrogancia»). É unha crítica á institución escolar atenazada pola xerarquía e a favor da liberdade de expresión. Nela están presentes tamén o acoso e a discriminación, sen esquecer o primeiro amor xuvenil.