Sébastien Lecornu será o quinto primeiro ministro de Francia en dous anos

Emmanuel Macron ha decido nomear primeiro ministro a Sébastien Lecornu, o ata o de agora ministro de Defensa. Desta forma o presidente da República opta por un home da súa total confianza. O seu nome xa fora barallado en numerosas ocasións para suceder a Elisabeth Borne, Gabriel Attal ou Michel Barnier. Finalmente, á quinta foi a vencida. Durante todo este tempo, desde o 2022, Lecornu permaneceu discreto xunto a Macron como ministro de Defensa.

O comunicado que emitiu onte á noite o Palacio do Elíseo para anunciar o nomeamento do primeiro ministro indicaba que o presidente da República lle ha encargado que consulte «ás forzas políticas representadas no Parlamento» co obxectivo de adoptar un presuposto e construír os acordos indispensables para poder adoptar as decisións que deberán tomar ao longo dos próximos meses. É significativo que non distinga como fixo noutras ocasións, descartando os extremos do espectro político, A Francia Insubmisa e a Agrupación Nacional.

Despois de manter esas discusións, Lecornu ten a misión de actuar guiado «pola defensa da nosa independencia e a nosa potencia, o servizo aos franceses e a estabilidade política e institucional para a unidade do país», reza o comunicado do Elíseo.

Sébastien Lecornu ten 39 anos e está inmerso na política desde os 19, primeiro como asistente parlamentario, despois como conselleiro no gabinete ministerial de Bruno Le Maire, entón ministro de Agricultura, e máis adiante como alcalde de Vernon e presidente do departamento do Eure.

Pero a súa verdadeira hora chegou no 2017, coa irrupción do macronismo na paisaxe política francesa. Lecornu, que pertencía ao partido conservador, Os Republicanos comezou a súa ascensión política: primeiro como secretario de Estado no ministro de Ecoloxía (2017-2018), despois como ministro de Colectividades Locais (2018-2020), onde se distinguiu coa organización de grandes debates entre Emmanuel Macron e os alcaldes franceses para atopar unha saída á crise dos chalecos amarelos, despois pasou a facerse cargo da carteira de Ultramar (2020-2022), e finalmente, desde o 2022, era ministro de Defensa. Tras ser expulsado dOs Republicanos por aceptar un posto no goberno de Macron, Lecornu afiliouse á República en Marcha.

Sen sorpresas, o presidente do grupo Xuntos (antiga República en Marcha), Gabriel Attal, felicitou a Lecornu desexándolle «éxito» nas súas novas funcións. Tamén recibiu o apoio dos seus aliados, o líder de Horizontes, Edouard Philippe está seguro de que Lecornu ten «as cualidades para intentar sentar na mesa a persoas que non farán exactamente o que eles queren, pero que serán capaces de porse de acordo para evitar que Francia empeore».

Bruno Retailleau, presidente dOs Republicanos, e ministro en funcións de Interior, expresou o seu alivio ao ver que Macron non optara por un socialista e dixo que está disposto a «atopar acordos» co novo primeiro ministro para «construír un proxecto que satisfaga ao que eu chamo a maioría nacional».

No resto da oposición o ambiente era moi distinto.

Para Eric Coquerel, deputado de LFI e presidente da comisión de Finanzas da Asemblea, a opción de Macron está dirixida «a evitar unha moción de censura da extrema dereita» porque o nomeamento de Lecornu é o «último fusible de Macron». Mentres que Jean-Luc Mélenchon avogou pola marcha de Macron. Marine Le Pen, de AN, asegurou que «o presidente dispara o último cartucho do macronismo» e tras «as inelutables futuras eleccións lexislativas, o primeiro ministro chamarase Jordan Bardella [presidente do seu partido]».

---

---

---