Unha xuíza federal detén a suspensión de visados a alumnos estranxeiros de Harvard ordenada por Trump

Unha xuíza do distrito de Massachusetts detivo temporalmente o intento do presidente, Donald Trump, de suspender os visados dos alumnos estranxeiros de Harvard, horas despois de que a universidade sinalase a proclamación como unha «represalia» inconstitucional.

A maxistrada Allison Burroughs concedeu a Harvard a orde de restrición temporal que pedía a través dunha demanda contra a nova normativa da Administración Trump, que, polo momento e en virtude desta orde xudicial, non poderá aplicar a política que pretendía. «Os máis de 7000 titulares de visados F-1 e J-1 de Harvard, e as súas persoas a cargo, convertéronse en peóns na crecente campaña de represalias do Goberno», denunciou a universidade.

A prestixiosa universidade referiuse á proclamación de Trump como unha represalia «en violación da Primeira Emenda» e que «invade de xeito inconstitucional a liberdade académica», e criticou que os alumnos internacionais «que veñen aos Estados Unidos para estudar en Harvard» non poden considerarse unha «clase de estranxeiros» sobre a que lexislar, segundo reflexa o texto da demanda presentada.

Deixar a Harvard sen financiamento prexudica a Estados Unidos

Adam Ezra Cohen

A proclamación, emitida onte polo presidente dos Estados Unidos, non só suspendía os visados a novos estudantes internacionais de Harvard, senón que tamén pedía considerar a revogación daqueles que xa cursan estudos neste centro académico.

No documento, Trump alegaba, entre outras cousas, que a universidade admite a estudantes de países «que buscan a destrución dos Estados Unidos e os seus aliados ou o exterminio de pobos enteiros» e que traballa en «investigacións que poderían contribuír á modernización militar» da China.

---

---