A UE aposta por «revisar a fondo» a política europea sobre África tras as asonadas
INTERNACIONAL
Os Vinte e sete prioriza a vía diplomática tras o golpe en Níxer, mentres marcan diferenzas co ocorrido en Gabón
31 ago 2023 . Actualizado á 21:56 h.Os ministros de Exteriores da Unión Europea abordaron onte a necesidade de «revisar» as políticas comunitarias cara a África nun momento en que proliferan os golpes de estado, como en Gabón ou Níxer, país onde a UE impulsara unha misión de formación dos seus militares. «Imos ter que revisar a fondo a nosa política cara a África», asegurou o xefe da diplomacia UE, Josep Borrell, á súa chegada á reunión informal que os ministros comunitarios de Exteriores celebran este xoves en Toledo.
Borrell asegurou que «está claro que non se pode dicir que fose un éxito porque [vemos] a proliferación de golpes militares e a presenza de Wagner en República Centroafricana, Malí, Burkina Faso». Tamén o ministro de Asuntos Exteriores en funcións, José Manuel Albares, recoñeceu a necesidade de «revisar» o que non está a funcionar. «Debemos ter en conta que hoxe na rexión hai outros actores, diferentes da UE, con diferentes obxectivos, con diferentes ferramentas, que non necesariamente buscan democracia e prosperidade para o pobo africano, senón para eles mesmos», engadiu, en clara referencia a Rusia.
Diferentes golpes
Ao remato da reunión, Borrell anunciou que os Vinte e sete estudarán «calquera proposta» exposta pola Comunidade Económica de Estados do África Occidental (Cedeao) para restaurar a «orde constitucional» en Níxer, aínda que prioriza a vía diplomática antes que militar. Acordouse a futura imposición de sancións contra os líderes golpistas, pero tamén se deixou claro que o ocorrido en Gabón difire polas dúbidas relativas á legalidade das últimas eleccións. Segundo Borrell, as eleccións que garantían un novo mandato ao presidente Alí Bongo xeraban «moitas dúbidas» en canto á súa «validez democrática».
A reunión informal de ministros contou entre os seus invitados co principal representante diplomático de quen, a día de hoxe, segue sendo considerado o Goberno «lexítimo» de Níxer. «Xa temos un apoio político e moral» por parte da UE, destacou o ministro de Exteriores nigerino, Hassoumi Massoudou.
Sobre a posibilidade dunha intervención militar, unha hipótese tanto Borrell como Albares, evitaron pronunciarse alegando que non está aínda sobre a mesa.