O internacional ganés do Celta encadea dous partidos tras máis dun ano sen xogar co equipo vigués
31 oct 2025 . Actualizado á 10:12 h.Joseph Aidoo xogou máis co Celta en catro días que no último ano e medio antes de irse cedido ao Valladolid. O ganés repetiu no once fronte ao Porto de Vega despois de estrearse no Sadar. Con respecto ao partido do domingo, tamén dobraron Mihailo Ristic e Damián Rodríguez. Dos conovocados do filial, o único titular foi Hugo González e o equipo vigués só saíu con dous xogadores con ficha do filial: o dianteiro valenciano e o defensor Yoel Lago -que en está en dinámica permanente do primeiro equipo, pero conserva a licenza B-.
Como de costume, Claudio Giráldez fixo os cinco cambios e tres deles foron para meter no campo a tres dos xogadores da Celta Fortuna que estaban no banco: Óscar Marcos entrou no descanso e pouco despois da hora, fixérono Andrés Antañón e Pablo Meixús, que se colocou como carrilero dereito, aínda que non é a súa posición habitual no filial. Manu Fernández e Sotelo completaron os cambios.
Sete futbolistas en común coa aliñación de hai un ano
O partido fronte ao Porto de Vega celebrábase xusto o día en que se cumpría un ano do debut no mesmo torneo da tempada anterior, que fora ante o San Pedro. Respecto a aquela aliñación, sete xogadores repetiron, todos os que seguen no club salvo Sergio Carreira e Pablo Durán, a quen Claudio Giráldez deu descanso nesta ocasión. Tasos Douvikas finalizou a súa etapa en Vigo o pasado xaneiro e Alfon González, en xuño.
Así, os xogadores que repetiron xusto 365 días depués foron Iván Villar en portería, Carlos Domínguez, Joseph Aidoo, Mihailo Ristic, Damián Rodríguez, Miguel Román e Franco Cervi. Completaron a aliñación Yoel Lago - que habia tido minutos desde o banco un ano antes-, Jones O-Abdellaoui, Hugo González e Hugo Álvarez.