O adestrador da Celta Fortuna dá «unha nota moi alta» aos seus xogadores, aínda que admite «pena» por non chegar á última xornada con opcións de play-off
18 may 2025 . Actualizado á 09:39 h.O adestrador da Celta Fortuna, Fredi Álvarez, fixo balance da tempada do equipo tras gañar ao Bilbao Athletic, un triunfo que non impide que queden sen opcións de play-off á falta dunha xornada, polo que a sensación é de ano acabado e, de feito, o persoal terá descanso ata o martes. «É unha pena -non manter as opcións-, pero temos que estar moi contentos por como foi a tempada. Creo que foi un éxito en canto a consolidación do proxecto», apunta.
Nese sentido, cre que este último partido na casa é «o claro exemplo». «Saímos con moitos xuvenís outra vez no once inicial e cos pesos pesados outra vez facendo gran partido para intentar consolidar un pouquiño o proxecto», valora. Considera que os seus xogadores fixeron « un traballo tremendo ante un rival bo», de modo que está contento por iso e «triste por non poder disputar en San Sebastián ese playoff». Todo, partindo da base de que ese «non era o obxectivo» e agora teñen que intentar rematar da mellor forma.
Na súa valoración do curso, Fredi acórdase dos condicionantes que tiveron, polo que el outorga aos seus futbolistas «unha nota moi alta, sabendo as dificultades» ás que se enfrontaron. Tamén expresa que «o proxecto se consolidou con varios xogadores que foron achegándose e asomándose ao primeiro equipo», o cal é «un éxito rotundo» do que se propuxeron desde inicio de competición, «independentemente da clasificación». «É unha tempada moi notable e a matrícula de honra xa sería meterse no play-off e pelexar por cousas importantes», asume.
En canto aos mozos, asegura que eran conscientes de que tiñan que ir «aos poucos» con eles. «A medida que ían desaparecendo xogadores para o primeiro equipo, como Fer (López) ou Yoel (Lago), máis a baixa de Dela no seu momento, ábrese a porta a outros futbolistas como foi o caso de Burcio, de Antañón, de moitos outros e hoxe, contento por eles porque fixeron un partido tremendo», sinala. Concretando no bigoleador, Andrés Antañón, confesa que xustamente lle pedían «máis presenza en área e capacidade de finalizar». «Fixo dous goles moi importantes e contento por eles, polo seu crecemento, que é para o que estamos, para acompañalos no camiño», lembrando que participaron seis xuvenís e que iso ten «un valor incalculable».
Preguntado polo cara que está a salvación este ano, Fredi constátao. «Vimos dicindo que ían facer falta moitos puntos, igualouse todo moito. O primeiro clasificado ten moitísimos puntos menos que o ano pasado, cando nós quedamos cuartos con 65. Cando os de arriba suman poucos, é porque os de abaixo puxeron moi difícil cada partido e sumaron moitísimos puntos», algo que cre que «engrandece un pouco o logro do equipo esta tempada».
Respecto aos seus xogadores que están co primeiro equipo, falou e que estiveron cos seus compañeiros do Fortuna antes da concentración, achegando o seu «granito de area» porque tamén se senten parte. «Falamos a miúdo e dígolles que cada oportunidade que teñan, saben que a teñen que aproveitar, que gocen do momento, que estean preparados para o que Claudio necesite deles e se é non xogar, é aprender e se é xogar, pois intentar facer o mellor posible e seguir crecendo». Destaca que eles están «coa mentalidade posta no seu obxectivo persoal, que é ser futbolistas» e está feliz por eles porque cada vez que xogan demostran que están «ao nivel de calquera xogador de Primeira».