O equipo de Fredi Álvarez, en postos de descenso, recibe á Ximnástica Segoviana
26 oct 2024 . Actualizado á 05:00 h.A Celta Fortuna, sen o sancionado Emi Rodríguez, agárrase a Balaídos para volver sumar. Os de Fredi Álvarez reciben este sábado (19.30 horas) a unha Ximnástica Segoviana que, a pesar de ser un recentemente ascendido, está a asinar un inicio de liga notable e conta con tres puntos máis que o filial, que tratará de darlle caza neste duelo da décima xornada de liga en Primeira Federación.
Os vigueses son décimo séptimos, ocupando zona de descenso, pero aínda non coñecen a derrota na casa. Comezaron con tres empates -ante Barakaldo, Arenteiro e Unionistas- e no seu anterior compromiso como locais, venceron ao Amorebieta, o que se traduce en que seis dos seus nove puntos conseguíronos no seu campo. En canto ao conxunto de Segovia, leva catro puntos de quince posibles como visitantes -unha vitoria, un empate e tres derrotas-.
Francisco Ramsés é o técnico da Ximnástica, co que conseguiu o ascenso o curso pasado tras tres tempadas dirixindo ao equipo en Segunda Federación.Ten ás súas ordes ao ex do Celta B Fernán Ferreiroa e ao tamén galego e xogador con pasado nas categorías inferiores Davo, que é o seu máximo goleador con cinco tantos. Veñen de gañar cun dobrete á Real Unión de Irún, mentres os célticos chegan tras caer ante o Lugo.
Os dous equipos só se cruzaron ata o de agora nunha tempada, a 2017/2018, na que empataron tanto en Segovia (0-0), como en Vigo. O resultado naquel partido en Barreiro foi de 2-2, con goles celestes de Juan Hernández e un rival en propia meta para igualar un 0-2 adverso (dobrete de Arribas).