Jeff Bezos casa en Venecia ao grande, pero os veciños da cidade non queren ser meros figurantes da súa opulencia
XENTE
O fundador de Amazon e a expresentadora Lauren Sánchez contraerán matrimonio con festexos na cidade italiana previstos para os próximos días. Traerán dous iates xigantescos e entre os invitados figuran celebridades da talla de Leonardo Di Caprio ou as Kardashian. Os habitantes non consentirán que a súa cidade se paralice por culpa da ligazón
20 jun 2025 . Actualizado á 12:02 h.Ao nordés de Italia, envorcada ao mar Adriático, a rexión do Véneto conta cunhas 100 pequenas illas resgardadas nunha lagoa. É, un lugar idílico e, á vez, a súa capital, Venecia, lida co feito de ser unha das cidades máis visitadas por turistas de todo o mundo. 3,2 millóns de persoas acoden a vela cada ano e, desde 2024, quen queira ir, debe pagar cinco euros diarios para que semellante aluvión, polo menos, repercuta en parte nuns veciños cansos xa de que as góndolas nas súas canles sexan para calquera menos para eles. Moitas outras urbes foron aplicando estas taxas turísticas seguindo o seu exemplo. En Galicia, Santiago xa ten a ordenanza aprobada para aplicala a partir do próximo mes de agosto. Será a primeira na nosa comunidade, seguida da Coruña, e ingresarase por persoa e día entre 1 e 2,5 euros.
Para alguén como Jeff Bezos, fundador de Amazon e propietario do prestixioso medio The Washington Post, esas cantidades son irrisorias. Podería pagar dous euros para que os 8.000 millóns de habitantes do planeta visen Santiago (é só un hipotético exemplo, non un chamamento a que suceda) e sobraríanlle máis de 190.000 millóns para outras cousas. É o que ten ser, segundo Forbes, a terceira fortuna do mundo, só por detrás de Elon Musk (dono de Tesla, SpaceX ou Twitter) e Mark Zuckerberg (creador de Meta, que aglutina Facebook, Instagram ou WhatsApp).
Así se explica que todo o que rodea a Bezos implique cifras mareantes. Cando se separou da súa primeira muller, MacKenzie, tras 25 anos xuntos, converteuna automaticamente na cuarta muller máis rica do mundo dados os 35.000 millóns de dólares nos que se pechou o acordo de divorcio. Agora o empresario, emparellado con Lauren Sánchez, casará e farao en Venecia. Como non, ao grande.
Dous megayates na baía
Por se Venecia non tivese xa suficiente co seu Festival de Cine, o cume de ministros de Xustiza do G7 celebrada o ano pasado e o seu instagrameable piazza San Marco, previsiblemente entre os próximos días 26 e 28 de xuño (as datas exactas gárdanse con receo) converterase no salón de vodas da expresentadora e o magnate. Poderoso cabaleiro é don Diñeiro, podería aplicarse aquí o poema de Francisco de Quevedo ou, dito doutro modo, se teño a pasta, por que non facelo?
Por iso é inminente a chegada á baía veneciana de dous iates descomunais, propiedade dos noivos. O principal é o supervelero Koru, que tras facer escala en Palma de Mallorca hai uns días, xa vai cara ao seu destino, previo paso pola Costa Azul. Cando parte o amor, cantaría Engaiola neste coloso do océano, faio en 127 metros de eslora e 3.300 toneladas de peso. Estreado en 2018, é o segundo iate a vela máis grande do mundo, custou 500 millóns de dólares e só mantelo vale 25 ao ano. Unha excentricidade colmada por un detalle que para ningúns será curioso e para outros dun pésimo gusto: o mascarón de proa está rematado cunha imaxe tallada dunha Lauren Sánchez alada.
E o Koru non vai só, neno, diríase en xerga coruñesa. Súmalle o iate Abeona, duns nada despreciables 75 metros de proa a popa. Unha embarcación de apoio con heliporto que serve para que a noiva, tamén piloto, aterre en cuberta con total comodidade. Non fose ser.
250 invitados de fama mundial
A conta atrás, tras propor Bezos a Sánchez matrimonio en maio do 2023 durante unha romántica viaxe polo sur de Francia, está a piques de rematar. Á voda asistirán, segundo publicaron medios de crónica social internacionais, máis de 250 invitados nunha cerimonia cuxo presuposto pasa os 15 millóns de euros. O escenario principal dos actos desta postal veneciana será a illa de San Giorgio, enfronte da icónica praza de San Marcos. Eva Longoria, Katy Perry, Leonardo Di Caprio, Ivanka Trump, Oprah Winfrey, Mick Jagger, Lady Gaga ou o clan Kardashian figuran entre os asistentes. Prevese a inminente chegada á costa de luxosas embarcacións para fondear o máis preto posible da baía. E quen non cheguen en barco, colapsarán unha cidade turística xa ao límite, copando hoteis de luxo e vilas.
Forte rexeitamento veciñal
Para darse conta da saturación turística, basta con acudir ao Observatorio Cívico da Residencia (LECER), que sinala que o centro urbano de Venecia ten tantos residentes como prazas de aloxamento, pouco máis de 49.000 en ambos os casos. Nin Cipriani, St. Regis, Gritti Palace, Danieli ou Aman, por citar algúns dos establecementos hoteleiros máis coñecidos, contan con camas dispoñibles para os días nos que se rumorea que terá lugar a ligazón. E ante semellante ocupación, xurdiu un potente movemento de rexeitamento social que pretende evitar, segundo a plataforma Non Space for Bezos, que Venecia sexa un mero «estudio para oligarcas». Nas últimas semanas, os veciños rexeitan converterse en manequíns dun «escaparate de luxo», exprésanse en manifestacións de protesta levadas a cabo entre outros lugares na praza da Escola da Misericordia, onde en teoría as campás dobrarán por Sánchez e Bezos o día 26 deste mes. «É un lugar moi doado de bloquear. Agardamos que a policía intente deternos, pero esta é a forma que Venecia ten de resistir», recolle a axencia EFE declaracións do seu portavoz, Marta Sottoriva.
Os venecianos esforzaranse en impedir as nupcias, apuntan os organizadores que están a canalizar o rexeitamento cidadán e que fían a súa estratexia a unha convocatoria que agardan que sexa masiva o próximo 28 de xuño. «Faremos que se lles atragoe a torta nupcial, iremos ao asalto e tirarémonos á canle se fai falta», ameazan, desvelando o seu plan para que o si, quero non chegue a pronunciarse: «Será unha protesta colorida e pacífica. Impediremos o acceso á igrexa por mar con botes inchables e barcas, e por terra cos nosos corpos».
Non comparten esta visión, Luigi Brugnaro, alcalde de Venecia, nin Luca Zaia, presidente da rexión do Véneto. «Protestar contra quen trae riqueza é unha absoluta vergoña. Que imaxe estamos a dar no estranxeiro? Seica non queremos que os ricos veñan aquí a casar, nin que os turistas nos visiten?», pregúntanse. En 2014, a cidade viviu un evento de similares características, cando o actor George Clooney e a avogada Amal Alamuddin, congregaron no suntuoso Palacio Ducal a decenas de invitados, con Matt Damon, Bono ou Cindy Crawford entre eles. Na velada houbo actuacións de Blondie ou Daft Punk e, suponse, que a barra libre habitual. Agardemos que sen garrafón.
Unha difícil convivencia, a do turismo, tamén de luxo; cos oriúndos. Os efectos da chamada xentrificación, o desprazamento da poboación orixinal por outra de maior poder adquisitivo, é moi notorio no centro histórico veneciano, que nunha década perdeu o 10% dos seus habitantes. Boa parte dos veciños que resisten son maiores de 65 anos que se negan a marcharse, mentres o número de turistas non deixou de incrementarse exponencialmente, habendo días nos que Venecia é pisada por máis de 100.000 forasteiros en apenas 24 horas.