Calabizo, o chourizo vegano do que todo o mundo fala, únese a Adegas Marqués de Vizhoja para ofrecer a maridaxe vegana perfecta

A gastronomía galega, berce de sabores intensos e profundamente vinculada á terra, está a vivir unha interesante transformación. Á vez que se revalorizan os produtos tradicionais, emerxen propostas innovadoras que respectan a contorna, a saúde e as novas formas de entender a alimentación. Desta fusión entre o clásico e o contemporáneo, nace unha maridaxe tan singular como coherente: o viño branco Marqués de Vizhoja e o chourizo vegano Calabizo.

Pode parecer un cruzamento improbable. Pero ao probalo, o padal celébrao cunha harmonía que sorprende e convence. «Calabizo é un produto fantástico para tomar cun viño de Adegas Marqués de Vizhoja, de feito, diriamos que o viño branco de Marqués de Vizhoja é unha maridaxe estupenda para o noso hummus de pemento. Encaixan perfecto», subliña Edurne Sendra, CEO de Calabizo.

Calabizo: a alma do chourizo, sen carne

Desde Nigrán, unha localidade costeira preto de Vigo, Calabizo revolucionou a charcutería vexetal cun produto que captura o sabor e a esencia do tradicional chourizo galego, pero sen ingredientes de orixe animal. A empresa conseguiu reinterpretar un das iconas do receitario galego, o chourizo, en clave vegana.

O seu éxito reside na súa receita: cabaza asada, pemento afumado da Beira, allo, cebola, sal e aceite de oliva virxe extras. Sen aditivos nin conservantes. Sen glute. 100% vexetal e sen sacrificar intensidade.

O proceso de elaboración respecta os tempos de curación natural e segue técnicas tradicionais, o que permite desenvolver unha textura firme e un sabor afumado e especiado que lembra ao chourizo de toda a vida, pero cun perfil máis lixeiro e dixestivo.

Calabizo preséntase en tres versións:

• Curado, ideal para consumir en frío, en táboas ou como tapa.
• Para cociñar, pensado para integrar en guisos, empanadas, arroces ou pasta.
• En conserva, xa cociñado, con múltiples posibilidades para tapas e pratos rápidos.

Marqués de Vizhoja: frescura, tradición e versatilidade en copa

O viño Marqués de Vizhoja nace na histórica Leira A Moreira, situada en Arbo (Pontevedra), a beiras do río Miño. Esta adega familiar, fundada en 1968 polo visionario viticultor Mariano Peláez, soubo combinar durante décadas o respecto á tradición cunha mirada aberta á innovación. Hoxe, os seus fillos Jorge e Javier Peláez continúan o legado, elaborando viños que expresan a alma da paisaxe galega.

Este viño branco mozo elabórase con uvas tradicionais para ofrecer un viño moi fresco, cun perfil afrutado e floral, marcado por notas de mazá verde, cítricos, pera e suaves toques herbales.

En boca, o Marqués de Vizhoja é lixeiro, vivaz e equilibrado, cunha acidez refrescante que o converte nun comodín gastronómico ideal. É perfecto como aperitivo, pero tamén se atreve con peixes, mariscos, queixos suaves e, por suposto, con embutidos innovadores como os de Calabizo.

Unha maridaxe con fundamento: contraste, equilibrio e territorio

A arte da maridaxe non sempre consiste en buscar similitudes. Ás veces, os contrastes ben medidos son os que xeran as experiencias máis memorables. E este é un caso paradigmático.

A textura untuosa e o afumado de Calabizo atopan no viño Marqués de Vizhoja un contrapunto ideal. A acidez do viño actúa como garantía da harmonía, xa que equilibra o aceite de oliva e realza a dozura natural da cabaza e as notas do pemento. Ademais, as súas notas florais entrelázanse coa intensidade especiada do chourizo vegano, xerando un efecto de sinerxía sensorial.

Para gozar dunha experiencia, ideal tanto para unha mesa vegana como para os padais máis curiosos, propomos tres suxestións de maridaxe cos produtos de Calabizo, que tamén se presta á experimentación culinaria máis sofisticada.

Empezamos polo aperitivo perfecto, calabizo preparado á prancha, hummus de Calabizo con regañás e o untable de pementos, e acompañamos todo cunha copa ben fría deste viño branco que conquista todos os padais.

Seguimos cun primeiro prato cunha fabada vexetal con Calabizo e o viño Marqués de Vizhoja, que contrarrestará a densidade do guiso e potenciará o perfil aromático que achega o chourizo, sen resultar invasivo. Unha combinación perfecta para elevar este prato de culler.

E para finalizar, propomos combinar o viño Marqués de Vizhoja cunha tosta de Calabizo en conserva con crema de aguacate, unha opción máis áxil e moderna, ideal para servir nun brunch ou nunha cea informal de picoteo.

Como explica Edurne Sendra, «cumpre con todo o que cumpre calquera chourizo, pero saudable e sostible, así que todas as maridaxes que funcionen cun chourizo tradicional, tamén o farán con Calabizo».

Unha experiencia ética e sensorial

Máis aló do pracer gastronómico, esta maridaxe é tamén un manifesto. O respecto pola terra, a aposta polo local, a innovación responsable e o compromiso con novos hábitos de consumo fanse presentes en cada sorbo e en cada bocado.

Adegas Marqués de Vizhoja e Calabizo representan dúas xeracións de produtores galegos que miran cara ao futuro cos pés firmemente ancorados no seu territorio. E xuntos, demostran que o goce gastronómico non só non está rifado coa sustentabilidade, senón que pode elevarse grazas a ela.