Besteiro reclama a Rueda que reoriente os fondos europeos que non se gastaron a políticas de vivenda
GALICIA
O líder do PSdeG culmina a súa viaxe de catro días a Bruxelas falando de medio ambiente e da emerxencia habitacional. Sobre os datos do eucalipto: «Se isto é controlar a moratoria, que veña Dios e que o vexa»
14 nov 2025 . Actualizado á 14:13 h.O secretario xeral do PSdeG, José Ramón Gómez Besteiro, culminou a súa viaxe institucional a Bruxelas reclamando ao presidente da Xunta, Alfonso Rueda, que reoriente os fondos FEDER que non se executaron a políticas de vivenda que permitan combater a «emerxencia habitacional» que se vive na comunidade.
«Iso pode marcar a diferenza entre actuar fronte á emerxencia habitacional ou perder unha oportunidade histórica», subliñou o líder socialista, que invitou a Rueda a que «aproveite a oportunidade» aberta pola Comisión Europea para destinar, antes de que remate o ano, os fondos FEDER —destinados directamente ás rexións— que non se activaron a políticas de vivenda na comunidade.
Besteiro, que subliñaba este xoves que a vivenda é unha cuestión prioritaria para o seu partido, tratou o asunto na capital comunitaria con dous comisarios do ramo. Na súa primeira reunión, co comisario de Equidade Interxeracional e Mocidade, Glenn Micallef, Besteiro trasladoulle a proposta do PSdeG de crear un «banco de alugueiro» para mobilizar vivenda baleira e frear os alugueiros abusivos.
Noutro encontro, o líder socialista comentou coa presidenta da Comisión Especial sobre a crise da vivenda, Irene Tinagli, a necesidade de incrementar os fondos destinados a vivenda pública para garantir que «permaneza en mans públicas» e que se amorteza así a emerxencia habitacional que sofre parte da poboación en Galicia e en toda a Unión Europea.
«Rueda ten ata o 31 de decembro para reorientar todos os fondos FEDER non executados e destinalos á vivenda. Galicia non pode perder esta oportunidade», recalcou Besteiro, tras destacar as dificultades que a mocidade galega atravesa para emanciparse e acceder a unha vivenda propia.
O líder do PSdeG, sobre os datos do eucalipto: «Se isto é controlar unha moratoria, que veña Deus e que o vexa»
Na última xornada da súa estancia en Bruxelas, Besteiro tamén se reuniu coa exministra Teresa Ribeira, agora vicepresidenta da Comisión Europea para a Transición Limpa. Con ela, o secretario xeral do PSdeG abordou a necesidade de que Galicia gañe impulso co Pacto Verde Europeo para «resituarse na primeira liña da transición enerxética» e criticou a inacción do PP, que ve aliñado en Bruxelas coa ultradereita, «absolutamente negacionista» co cambio climático.
Pola súa banda, Teresa Ribeira mostrouse «plenamente consciente» da gravidade dos incendios que sufriu Galicia este ano e sinalou a importancia de reforzar as políticas de prevención. Tras o encontro con ela, Besteiro aproveitou tamén para valorar os datos de plantacións de eucalipto que se coñeceron este xoves e que cifran en máis de 19.000 hectáreas a expansión da especie. O socialista criticou as «portas de atrás» que abre a expansión da moratoria e lamentou que iso supoña máis presenza de eucalipto. «Coníferas e frondosas redúcense e o eucalipto medra; se iso é controlar unha moratoria, que veña Dios e que o vexa», censurou.