A decisión tomada este luns desbloquea o debate sobre a transferencia, pero o proceso atrasouse tanto as anteriores veces que acabou decaendo
22 oct 2025 . Actualizado á 09:12 h.O 11 xuño do 2024 o Congreso dos Deputados escoitou os argumentos dos tres parlamentarios da Cámara galega desprazados a Madrid a defender por cuarta vez en oito anos a transferencia da AP-9 á Xunta. A Cámara Baixa aceptou entón abrir un debate sobre a petición galega, e incluso facelo de xeito urxente. Ao final, pasaron desde entón 497 días nos que o consenso para debater o traspaso e a súa urxencia foron esquecidos ata este mércores, cando se levanta o veto tras 45 prórrogas para presentar emendas.
Que falta para aprobar a transferencia da AP-9?
A decisión tomada este luns pola Mesa do Congreso desbloquea o debate exposto desde o Parlamento galego, pero de xeito máis teórico que práctica. As emendas que ata hoxe póidanse presentar ao articulado da proposición sumaranse ás propostas que os membros do relatorio que se constitúa na Cámara Baixa expoñan para pechar o texto que finalmente sexa votado. Antes, a Comisión de Transportes do Congreso ten que elixir os membros do relatorio, estes definir como podería realizase a transferencia e dita proposta ser votada na comisión, logo no Pleno e máis tarde no Senado.
Dará tempo antes das eleccións xerais?
As tres veces anteriores que a petición unánime do Parlamento galego chegou ao Congreso, as prórrogas para a presentación de emendas e a creación do relatorio (tardou 520 días en constituírse no 2021) dilataron tanto a posibilidade de entrar no fondo do debate que decaeu pola convocatoria das eleccións xerais, obrigando a reiniciar a petición por parte da Cámara galega. Como moi tarde, as xeneralas deberían celebrarse en xuño do 2027, o que daría tempo a acordar o texto da transferencia e votalo. Pero nas ocasións anteriores unha marxe semellante non foi suficiente, e a ameaza do adianto electoral volve estar presente.
Que postura ten cada grupo parlamentario?
O PP e o PSOE mostráronse en contra da transferencia da autoestrada á Xunta cando tiveron o Goberno. Esa postura está directamente relacionada coa obstrución que sufriu no Congreso desde o 2016 a petición de traspaso. En Galicia, en cambio, os dous partidos e o BNG coincidiron sempre en apoiar a petición de transferencia.
Cal é a opinión do actual Goberno?
O ministro de Transportes, Óscar Puente, mostrouse abertamente en contra da transferencia da autoestrada á Xunta, ao advertir un difícil encaixe xurídico por ser unha infraestrutura clasificada de interese xeral por estar integrada na rede de conexións internacionais europeas (remata nas proximidades da fronteira con Portugal), pero, sobre todo, por estar bonificados as súas peaxes ata nun 75 % con cargo ás arcas do Estado.
Puente estima como moi complicado ceder a titularidade dunha autoestrada na que o principal cliente e pagador seguiría sendo o seu ministerio. Mantén que o que lles importa realmente aos condutores galegos é que a autoestrada estea bonificada e tenda cara á súa gratuidade, e non tanto quen sexa o titular da infraestrutura.
Transferíronse outras autoestradas en España?
Si. A AP-8 foi transferida á Administración vasca en 1999 polo Goberno de José María Aznar. O Executivo de Pedro Sánchez traspasou en plena campaña electoral do 2019 ao Goberno do País Vasco o tramo da AP-68 que une Bilbao co límite de Álava con Burgos. Pero foi Cataluña a pioneira en reclamar o traspaso de autoestradas e logralo. Foi en 1995 cando o Goberno de Felipe González cedeu a Jordi Pujol a autoestrada fronteiriza AP-17 e tamén a AP-19, convertidas pola Generalitat nas C-32 e C-33.