Vivenda afirma que ten en marcha 2.943 pisos, o 73% dos prometidos entre os anos 2024 e 2028
GALICIA
As promocións suman en total 451 millóns dos que 208 son de investimentos xa licitados
15 sep 2025 . Actualizado á 21:06 h.O Goberno galego aprobou un informe da Consellería de Vivenda que eleva a 2.943 os pisos de promoción pública que se puxeron en marcha desde o 2024. Esa cifra, lembrou Alfonso Rueda, supón o 73% das 4.000 vivendas comprometidas para esta lexislatura, que finalizará a inicios do 2028.
O obxectivo da Xunta é duplicar o parque de vivenda pública dispoñible en Galicia e paliar a subida de prezos do alugueiro rexistrada nos últimos anos.
Rueda explicou que a cifra inclúe todos os pisos en distintas fases de trámite ou construción. Esas operacións suman en conxunto 451 millóns de euros, dos que 208 corresponden a investimentos xa licitados e en «diferentes fases de execución».
Segundo os datos do Goberno galego, 825 vivendas están xa en obras. Noutras 56 licitáronse os traballos. As restantes 2.062 están en estado de licitación ou estase executando a redacción de proxecto e a dirección de obra.
A promoción de novos pisos está a desenvolverse a través do Instituto Galego de Vivenda e Solo e da Sociedade de Vivenda Pública de Galicia, constituída este ano e que ten o obxectivo de pór en marcha 2.350 fogares durante esta lexislatura. A entidade está pendente de cesións de chan de varios concellos para sumar máis proxecto ás 768 vivendas que ten en marcha na actualidade.
A distribución por provincias das novas promocións é a seguinte: Na Coruña, en concreto nos municipios e A Coruña, Santiago, Ferrol, Narón e Teo, están en marcha 966 pisos, dos que 574 están en licitación ou execución de proxecto e 212 están en obras.
En Lugo hai 597 vivendas en marcha, 451 en licitación ou execución de proxecto e en 146 iniciáronse xa traballos.
En Pontevedra hai proxectos en marcha na capital da provincia e en Vigo, Vilagarcía, Mos, A Estrada e Lalín. Suman en total 1.304 vivendas, das que 845 están en licitación ou execución de proxecto, 56 teñen a obra xa licitada e 403 en execución.
Para rematar, na provincia de Ourense, en concreto en Ourense cidade e San Cibrao das Viñas, a Xunta ten 76 vivendas en marcha, 12 en licitación ou execución de proxecto e 64 en obras.
O presidente da Xunta destacou a colaboración de concellos de distintas cores políticas para impulsar a construción de novos fogares, e subliñou que os datos «amosan que Galicia cumpre» e que o Goberno galego «avanza con paso firme» para cumprir os seus compromisos.