Albergues galegos detectan un brusco descenso de peregrinos polos incendios: «É o primeiro agosto que me quedan camas libres»
GALICIA
Na última semana, detectaron un número elevado de cancelacións tras as restricións que puxo a Junta de Castilla y León para facer a ruta pola zona de Astorga
22 ago 2025 . Actualizado á 18:13 h.«Até hai dous ou tres días non nos cancelaba ninguén practicamente, pero dende entón non fan máis que facelo. Isto é un senvivir». Explícao así Estrella Núñez desde Casa Campelo, un albergue de peregrinos que rexenta no Cebreiro, a primeira parada en Galicia polo Camiño Francés. Detrás desas cancelacións, están tamén os incendios. O pasado luns, o servizo de Emerxencias de Castela e León estableceu restricións no tramo de camiño de Santiago entre os municipios de Astorga e de Ponferrada. Levantáronse o mércores, pero Protección Civil envío alertas a miles de peregrinos solicitando que suspendesen o seu traxecto na provincia de León. Isto rematou provocando un descenso na ruta nun mes crave para os albergues. «Isto estanos a afectar moitísimo», di Estrella.
É unha situación que non entende, porque «non hai ningún problema polo Camiño de Santiago». A xerente de Casa Campelo admite que viron lume, si, pero que «está moi lonxe» e cre que os efectos que ten sobre a zona son menores: «O ambiente está un pouco máis cargado de vez en cando, e hai algo de cinza nas portas». Por iso cre que «cancelar o paso de peregrinos, non sei a que vén». Os poucos que están a recibir cóntanlle que non teñen ningún problema para chegar. «Chegan peregrinos todos os días», di, aínda que na última semana, cancelaron a súa reserva alí ata dez persoas.
Non é un caso único. No Albergue de Peregrinos de Laza percibiron a mesma situación. «Nos últimos cinco ou seis días debimos de ter catro persoas», aseguran desde a súa recepción. Matizan que isto non é un indicador absoluto, xa que a recepción de peregrinos é bastante irregular, pero «moita xente chamou dicindo que non se atrevía a empezar o Camiño ou que decidiu parar até que se tranquilizase a cousa».
Outras pensións como A Pedra, en Sarria, están ao 30 %, mentres que en agosto acostuman estar completos, segundo indica o seu xerente. Tras 22 anos dirixindo o albergue, «é o único ano que me quedaron camas libres este mes». Recibiu unhas 20 chamadas para cancelar reservas. «Todo o mes de agosto foi bastante frouxo e xullo, que en xeral sempre adoita selo, tamén baixou máis do normal», conclúe.
Estes dous últimos meses tamén foron «os máis malos» para o Albergue de Peregrinos de San Cristovo de Cea, segundo confirma o seu hospitalero, Orlando Torres. Aínda que, ademais de cos incendios, o experimentado xerente relaciónao tamén con que sexa Ano Xubilar, con moitas persoas peregrinando ata Roma. «Desde Semana Santa sobran camas todos os días. Onte (xoves), por exemplo, tiven 12 peregrinos para 40 camas e son o que máis tivo do Camiño desde A Gudiña ata aquí», engade. Explica que durante os 27 anos que leva traballando «os meses de xullo e agostos enchíase practicamente todos os días».
Noutros albergues, como o compostelán de La Estrella de Santiago, explican o descenso dos peregrinos cunha cuestión económica, polo aumento dos prezos, máis que polos incendios. No relativo a esta última semana, o seu xerente indica que a capacidade do local variou ao longo das xornadas, «algúns días con menos xente, debido á suspensión das vías, e outros con máis porque tiñan que quedarse máis días debido aos cortes dos trens».
A hospitalera de La Estrella sinala que o seu local non se viu afectado economicamente pola perda de clientes, porque «está ben situado, preto da catedral». En cambio, Núñez valora as perdas de ingresos do seu local nun 50% fronte a outras semanas. «Estamos traballando, pagando ao persoal e os gastos do albergue, para que ao final veñan dúas persoas un día. E, loxicamente, tes que vir atendelos igual», clama, advertindo que «nin cando foi o covid tivemos tanto problema».
A Asociación Galega de Albergues Privados pide prudencia
Desde a Asociación Galega de Albergues Privados (Agalber) alertaron este venres de que os seus asociados están a recibir unha gran cantidade de cancelacións «motivadas polo medo pola desinformación». A organización asegura que «en realidade, a maior parte dos tramos están abertos, transitables e sen risco ningún».
Con iso, Agalber solicitou, a través dun comunicado, prudencia na difusión de información e recomendou aos peregrinos que teñan previsto realizar o Camiño que contacten directamente cos seus albergues para informarse sobre a situación real en cada zona. «Estamos en contacto entre nós, compartimos información e sabemos perfectamente que tramos están abertos ou cales poden estar afectados», sinalou a asociación.