Mantense moi grave no Chuac o brigadista de 18 anos ferido en Oímbra, e os seus dous compañeiros continúan con prognóstico grave

Os tres brigadistas feridos no incendio de Oímbra seguen ingresados na Unidade de Queimados do Complexo Hospitalario Universitario da Coruña (Chuac), segundo o parte médico deste venres, 15 de agosto.

O máis mozo, de 18 anos, presenta queimaduras de terceiro grao que afectan ao 40% do seu corpo e unha intoxicación por inhalación de fume. O seu estado é estable, pero o prognóstico continúa sendo moi grave.

O brigadista de 23 anos sofre queimaduras de segundo grao no 15% do corpo e afectación respiratoria por fume. Evoluciona favorablemente, aínda que o seu prognóstico segue sendo grave.

O terceiro, de 25 anos, tamén ten queimaduras de segundo grao no 15% do corpo e intoxicación por fume. Permanece estable e con prognóstico grave.

Detido un home ao que lle imputan unha imprudencia grave que causou o incendio que calcina máis de 5.000 hectáreas en Oímbra

La Voz

Os tres resultaron feridos o luns ao verse sorprendidos polas chamas durante os labores de extinción. Foron rescatados polos seus compañeiros e trasladados de urxencia ao hospital. O lume de Oímbra, que tamén afecta a outros concellos limítrofes, é outro dos máis virulentos en canto á súa evolución. Queimou unha superficie de 8.000 hectáreas, exactamente as mesmas que desde Medio Rural adxudícanse ao lume orixinado na Mezquita. Un home de 46 anos foi detido, segundo informou a Garda Civil de Ourense, por un presunto delito de imprudencia grave que causaría este incendio de Oímbra, un dos máis graves da onda que arrasa a provincia de Ourense.

---

---