O comisionado para o Corredor Atlántico defende o ritmo dos investimentos en Galicia

O comisionado para o desenvolvemento do Corredor Atlántico, José Antonio Sebastián, defendeu este mércores, nun coloquio empresarial organizado pola Confederación de Empresarios de Galicia (CEG), o ritmo dos investimentos en Galicia e o cumprimento cos regulamentos europeos. Detallou que no que vai de ano licitáronse 1.789 millóns de euros no desenvolvemento do Corredor Atlántico no seu conxunto, unha cantidade superior aos 1.406 licitados de 2024.

Neste sentido, a previsión é superar os 2.000 millóns durante os próximos seis anos. A data obxectivo é o 2030, cando o comisionado sinalou que os compromisos da rede básica deberían estar cumpridos, segundo recolle axénciaa Efe. Ante a petición de «tempos competitivos» no transporte ferroviario feita polo  presidente da CEG, José Manuel Vieites, o comisionado asegurou que esa redución de tempos «non pasa polo tema do estándar da vía, senón do tipo de servizo que se presta».

Vieites asegurou que para a CEG é «imprescindible» asegurar as partidas necesarias para abordar as infraestruturas pendentes nos prazos previstos, e mostrou a súa preocupación pola falta de presentación de proxectos ás convocatorias do Mecanismo Conectar Europa para actuacións en Galicia. Insistiu en que é necesario executar os investimentos precisos para que a rede básica estea lista en 2030 e definir fórmulas que axilicen todos os permisos e trámites que frean investimentos importantes.

Proximidades en Galicia e a AVE ata Porto

Sobre temas concretos, como o proxecto para implantar proximidades ferroviarias en Galicia, o comisionado remitiuse á recente visita do secretario de Estado de Transportes, José Antonio Santano, e reiterou que o estudo será presentado «probablemente» a finais de ano ou a principios do seguinte.

En canto á conexión por alta velocidade ferroviaria entre Vigo e Porto, insistiu en que «España estará a agardar aos portugueses na fronteira». «Eles só teñen en construción o tramo Évora-Elvas, ningún outro, e cero quilómetros en funcionamento de alta velocidade. Hai que dicilo, porque senón parece que fixeron ou están a facer cousas que non son verdade», engadiu.

Sebastián tamén aludiu á situación dos aeroportos galegos e dixo que lle «fai moita graza» que se comparen co Porto. Explicou que o ano pasado a terminal portuguesa moveu case 16 millóns de pasaxeiros, por menos de 6 millóns entre as tres terminal galegas; o que atribuíu «á escandalera de 37,4 millóns de euros» que a rexión do Porto paga á aeroliña Ryanair. Na súa intervención, tamén xustificou no regulamento europeo que os portos de Vigo e Ferrol non sexan portos nodais, xa que «non cumpren cos criterios requiridos», como si o fai o porto da Coruña, por exemplo.

---

---

---