A Xunta e Gadisa estudan como cubrir a demanda de man de obra no  sector alimentario

O conselleiro de Emprego, Comercio e Emigración, José González, e o director xeral de Comercio e Consumo, Gabriel Alén, entrevistáronse co presidente e conselleiro delegado do grupo Gadisa, Roberto Tojeiro, nas instalacións que a firma ten en Betanzos, onde analizaron medidas para captar e reter talento co fin de cubrir a demanda de man de obra no sector.

Durante o encontro destacouse a necesidade de impulsar a formación sensible, de acordo coas liñas marcadas pola Unión Europea, adaptada ás necesidades do sector da distribución alimentaria. O Goberno galego xa traballa na redacción dun decreto de microcredenciales para o traballo que debe blindar un modelo formativo adaptado.

A Xunta tamén dispón este ano dun presuposto de oito millóns de euros para apoiar as unidades formativas nas empresas e destinou outros dous millóns ao Bono Talento Empresa, cuxa convocatoria se publicará en próximos días. O bono pretende financiar accións formativas non regradas, breves e deseñadas de acordo coas necesidades das empresas. 

O Goberno galego ten tamén unha estratexia de captación de talento no exterior a través do programa Retorna Cualifica Emprego, que canaliza o regreso de profesionais cualificados entre a emigración galega. O programa inclúe axudas ao alugueiro, ás que se sumará unha orde de rehabilitación de vivendas que estará ao dispor deses traballadores. O programa foi promocionado en marzo en Arxentina e Uruguai mediante feiras de emprego ás que acudiron 3.500 persoas. 

---

---