As universidades galegas escalan postos no QS, un dos ránkings internacionais máis importantes
GALICIA
A USC sobe ata a posición 628, coa Uvigo mellorando e coándose entre as 900 mellores do mundo, e a UDC estable
19 jun 2025 . Actualizado á 22:33 h.O ránking universitario QS, elaborado pola compaña Quacquarelli Symonds, acaba de publicar a súa última clasificación internacional, na que as universidades galegas escalan posicións respecto ao informe anterior. Na edición do 2026 a USC sobe ao posto 628, tras estar no ránking do 2025 no intervalo 651-660. Tamén a Universidade de Vigo mellora nesta clasificación, ao pasar dos postos 901-950 ao tramo 851-900. A UDC pola súa banda mantense estable na posición 1.001-1.200.
Trátase dunha das clasificacións máis fiables, cuxa puntuación se obtén de acordo cunhas porcentaxes aplicadas a determinadas variables. As percepcións de académicos de todo o mundo constitúen o 30 % do total; o número medio de citas obtidas por cada membro da institución suma o 20 % da nota global, e a cualificación dos empregadores sobre a preparación dos graduados un 15 %.
O ránking internacional encabézao o Massachusetts Institute of Technology (MIT), nos Estados Unidos, e na segunda posición sitúase o Imperial College London. Stanford, Oxford e Harvard completan o quinteto das cinco mellores universidades a nivel mundial. En canto á situación das españolas, encabezan esta listaxe dúas institucións catalás, a Universidade de Barcelona (160) e a Autónoma de Barcelona (172). A Complutense e a Autónoma de Madrid ocupan a terceira e a cuarta posición entre as españolas, e na quinta sitúase a de Navarra.
Este tipo de clasificacións analizan indicadores sectoriais, tanto de ámbitos de coñecemento como de parámetros como sustentabilidade, redes de investigación internacionais ou reputación académica. Vigo, por exemplo, figura no posto 281 do mundo en canto a sustentabilidade, e a Universidade de Santiago acada o 359 en reputación académica.