O formulario dixital aplicarase a todos os níveles, de infantil a FP, e convivirá cos de papel
21 may 2025 . Actualizado á 18:32 h.Os alumnos galegos poderán matricularse a través do teléfono móbil. O conselleiro de Educación, Román Rodríguez, anunciou hoxe mércores no Parlamento que o novo sistema estará para o próximo curso 2025-2026 e poderán empregalo os estudantes de todas as etapas, desde infantil ata bacharelato e FP.
O prazo de matrícula nos centros escolares galegos estará aberto do 20 ao 30 de xuño para os pupilos de infantil e primaria e do 23 de xuño ao 7 de xullo para os de ESO e bacharelato.
Rodríguez considerou a medida «un avance» para as familias e os centros educativos, que seguirán tendo ao seu alcance a matrícula en papel para os alumnos que os prefiran.
A pesar de todo, agarda que o novo sistema reduza o papelorio que afrontan tanto os estudantes como os traballadores do sistema educativo. A súa aplicación inclúese entre as medidas de redución da burocracia adoptadas pola Xunta no marco do acordo de mellora do sistema educativo pactado cos sindicatos no 2023.
Rodríguez anunciou a posta en marcha da matrícula por móbil na súa resposta a unha interpelación da parlamentaria do BNG Cristina Fernández Dávila, que reclamou melloras no sistema educativo.
A deputada esixiu que se reduzan as cocientes de alumno por profesor e que se recuperen as melloras para o persoal docente recollidas no acordo que o seu partido e o PSdeG asinaron no 2007, cando ambas as formacións gobernaban a Xunta.
O conselleiro replicou que xa se está aplicando unha redución das cocientes de acordo co citado pacto acadando pola Xunta cos sindicatos UGT, CC.?OO. e Anpe no 2023. A CIG, a central próxima ao BNG, non o secundou. Rodríguez lamentou que ese partido acudise ao Parlamento co mesmo discurso «negacionista» e considerou que é o sindicato o que controla a acción do partido.