O Sergas prepárase para un verán complicado: incentivos para médicos itinerantes e mires voluntarios que cubran as ausencias
GALICIA
O conselleiro asegura que vai haber problemas pola falta de especialistas en todos os niveis asistenciais. A próxima semana Ministerio e comunidades debaten medidas para abordar a necesidade de profesionais
28 may 2024 . Actualizado á 16:45 h.Nos últimos anos, a planificación dos veráns sempre se presenta complicada no Sergas. Baixan as urxencias e a actividade asistencial, pero non hai médicos para cubrir os períodos de vacacións, así que as zonas e servizos máis tensionados —urxencias, atención primaria, hospitais comarcais, localidades costeiras— teñen moitos problemas para garantir a cobertura de todas as súas vacantes. A Consellería de Sanidade sábeo, non é unha situación exclusiva de Galicia, e empezou a facer os deberes para minimizar este déficit de profesionais, con medidas que inclúen incentivos económicos.
O conselleiro de Sanidade, Antonio Gómez Caamaño, avanzou nun acto na Axencia de Doazón de Órganos e Sangue (ADOS), que o seu departamento prepara un plan para conseguir cubrir as ausencias. «A situación é complicada e estamos empezando a planificar, en primeiro lugar estamos facendo unha análise da situación porque é variable en función da localidade», apuntou. Haberá dúas medidas destacadas e as dúas comportarán un incentivo económico, nun caso a médicos adxuntos e no outro aos residentes de último ano.
A primeira delas é a creación dunha bolsa de facultativos itinerantes para ausencias e tensións puntuais. Probablemente a atención primaria sexa o nivel asistencial máis beneficiado, tanto en ordinaria —centros de saúde— como en urxencias extrahospitalarias —nos PAC—. Esta bolsa será voluntaria e haberá incentivos para quen acepte realizar estas itinerancias.
A segundo pretende liquidar o problema puntual que se producirá este verán coa ausencia de mires que rematan a súa formación. Debido á pandemia, os residentes que debían comezar en maio do 2020 non fixérono ata setembro, polo que este verán non haberá nova fornada de adxuntos, o que deixa ás áreas sanitarias nunha situación complicada. Para solucionar estes meses a Xunta ofrecerá aos residentes de último ano se queren traballar tanto en primaria como en urxencias ou outros servizos deficitarios, «sempre de xeito voluntario e baixo supervisión», apuntou Caamaño, e cunha compensación económica.
Este será un dos temas que con seguridade comunidades e Ministerio de Sanidade tratarán na reunión do consello interterritorial do Sistema Nacional de Saúde que se celebra o 5 de xuño. A ministra, Mónica García, lembrou aos conselleiros a través dunha carta que non se pode contratar os residentes de último ano como adxuntos nin situalos sen supervisión presencial. É dicir, non poderán cubrir unha baixa nun centro de saúde no que non haxa outro profesional, por exemplo.
O conselleiro asegurou que se cumprirá a legalidade: «Non podes facer que un residente traballe con contrato de adxunto, pero si como médico residente cunha prima por un traballo específico». Sobre se estarán sós, precisou: «Ninguén vai traballar so, e o máis importante, isto é voluntario, é un exercicio de xenerosidade dos residentes ao sistema público de saúde».
De momento estase traballando coas xerencias para sondar aos profesionais e saber cantos aceptarían algunha destas opcións. Gómez Caamaño confía en ter todo pechado a metade de xuño. Aínda que hai servizos e zonas con máis necesidade, é un plan para toda Galicia e para todas as áreas, «en todos os niveis asistenciais vai haber problemas porque a xente se vai de vacacións».
Máis aló do que poida propor ás comunidades o vindeiro mércores na reunión do interterritorial, desde o Ministerio de Sanidade apuntan que os servizos de saúde tiveron tempo de planificar e propón medidas como «incentivar o goce das vacacións fóra do período estival onde adoitan acumularse as dificultades de contratación, a distribución de efectivos e quendas ou outras medidas».
O conselleiro de Sanidade avanzou estas medidas nun acto en ADOS, en Santiago, onde destacou a participación da poboación galega nas doazóns de sangue, máis de 103.000 o pasado ano. Nestes momentos a situación está totalmente normalizada pero tanto a directora de ADOS, Marisa López, como o conselleiro, lembraron a importancia de doar xa que se necesitan entre 400 e 500 extraccións diarias para garantir a actividade asistencial dos centros sanitarios. «O verán sempre é unha data complexa pero non estamos agora para nada nunha situación complicada», concluíu López.