No 2001 o tramo de 20 a 24 era o máis nutrido, e agora éo o de 45 a 49
20 dic 2022 . Actualizado á 10:25 h.As pirámides de poboación confecciónanse en tramos de idade que parten de cero anos e sucédense de cinco en cinco ata acadar na súa cúspide o grupo final de cen anos ou máis. O debuxo demográfico perfecto é o que ten unha base ampla e numerosa para ir diminuíndo progresivamente nos chanzos seguintes, como podería ser o do ano 1981. Pero hai tempo que a pirámide de poboación galega deixou de ter esa forma e converteuse nun vaso que cada vez sobe máis a súa parte superior e perde estabilidade na base, onde están os grupos encargados da substitución demográfica.
A pirámide de idade galega só cumpre o precepto de contar no alto, no espazo reservado aos maiores de 100 anos, co menor continxente de toda a gráfica, pero as novas cifras de poboación pechadas ao 1 de xaneiro do 2022 revelan que os centenarios conforman o grupo que máis crece porcentualmente de toda a mostra poboacional de Galicia.
O Instituto Galego de Estatística acaba de notificar que ao empezar este exercicio había en Galicia 1.328 persoas con 100 ou máis anos, mentres que ao final do século anterior eran 650. Segundo ese rexistro, os centenarios son un 5,6% máis que o ano anterior, porcentaxe que incluso aumenta un 18,6 nos homes, pois 287 pasan a centena, e un 2,5% nas mulleres, 1.042 en total, como se apunta no novo informe sobre a poboación galega.
Outro síntoma do envellecemento da sociedade galega, pero tamén da súa maior esperanza de vida, é que o segundo grupo que máis crece é o de 95 a 99 anos, un 5,5% (10.908 residentes), xunto ao tramo anterior, de 90 a 94 anos, que aumenta nun 4,3% (40.231 membros), e ao de 85 a 89 anos, que sobe noutro 2,6% (87.719). Pero o ensanche do extremo superior da pirámide gaña máis protagonismo ao baixar aos tramos de menor idade. O de 0 a 4 anos baixa nun 5,1%, e o seguinte faio noutro 1,5. A base da pirámide ten menos integrantes que o grupo de 85 a 89 anos, e tamén queda debaixo de calquera chanzo anterior. O grupo de ata 4 anos (83.211 galegos) só supera a cada un dos tres de 90 anos en diante, o que prevé unha ruína demográfica inmediata e a intensificación da caída demográfica a medio prazo.
O tramo que máis crece en números absolutos é o de 75 a 79 anos (en 5.006 persoas), e o que máis baixa é o de 35 a 39 anos (con 9.193 menos). Este grupo segue sendo clave en materia natalicia, polo que a súa baixada ten efectos inmediatos na procreación. O chanzo onde está o maior número de galegos é o que vai dos 45 a 49 anos, con 225.962 residentes, o 8,4% do total. Ao comezo do século XXI o grupo máis nutrido era o de 20 a 24 anos, o que demostra unha vez máis o inexorable envellecemento de Galicia.