Galicia carece ata agora dunha normativa propia
17 ene 2020 . Actualizado ás 18:18 h.O Goberno galego acaba de iniciar a elaboración da que será a primeira lei propia de avaliación ambiental de plans, programas e proxectos. Así o acordou esta semana o Consello da Xunta, que decidiu abrir un período de consulta para que os colectivos e persoas interesados poidan trasladar as súas achegas.
Ata agora, Galicia carece de normativa propia en materia de avaliación ambiental, unha materia na que se aplica a lei estatal. Con todo, a Consellería de Medio Ambiente entende que o proceso de tramitación das avaliacións ambientais prolóngase en exceso, e isto acaba derivando en atrasos na posta en marcha de determinadas actividades económicas.
Neste contexto, iniciouse a tramitación dunha norma con rango legal que simplifique e dea claridade e axilidade á tramitación destes procedementos administrativos de avaliación ambiental. Outro dos obxectivos é que achegue seguridade xurídica aos operadores económicos, sen que iso signifique un retroceso no nivel de protección ambiental que marcan as directivas da Unión Europea.
Clarificar os organismos e entidades aos que se debe trasladar a consulta en cada caso é un dos retos que se marcou esta norma. Deste xeito quérense evitar atrasos innecesarios.
A lei tamén simplificará os informes ambientais que se esixen ante posibles afeccións á Rede Natura e aclararía todos os procedementos que deben seguirse en relación con trámites e prazos. A consulta pública previa pode consultarse no portal de Transparencia da Xunta.