72 dos 81 mortos de tráfico deste ano perderon a vida en vías convencionais
GALICIA
As catro vítimas do sábado pereceron en colisións en estradas secundarias
04 novs 2019 . Actualizado ás 05:00 h.Ponte Caldelas, Ames, Brión. Son os escenarios dos tres accidentes de tráfico que o sábado se cobraron a vida de catro presentas. As catro perderon a vida en estradas secundarias. Formarán parte dunha estatística demoledora segundo a cal ao redor de nove de cada dez mortes de tráfico prodúcense en vías convencionais. Os datos do que vai de ano en Galicia constatan fielmente esta estatística. Dos 81 mortos de tráfico contabilizados ata última hora do sábado, 72 producíronse en estradas de dobre sentido de circulación, e nove en autovías e autoestradas.
As estradas convencionais e os traxectos curtos figuran entre as maiores preocupacións das autoridades de Tráfico. O son porque o desprazamento nun tramo coñecido fai aumentar a confianza do condutor e iso facilita as distraccións e a circulación a velocidades inadecuadas. Nesas circunstancias é habitual cometer erros, e nesas estradas un erro pode ser mortal.
Os accidentes neste tipo de viarios, ben por colisións entre dous vehículos, ben por saídas de vía que finalizan nun choque con algún obstáculo, son os sinistros máis frecuentes en Galicia e os que máis vidas se cobran sobre o asfalto.
Pondo o obxectivo nunha das causas deste tipo de accidentes, a velocidade inadecuada, Tráfico limitou fai uns meses a velocidade máxima permitida nas vías convencionais, que pasou de cen a noventa quilómetros por hora no caso de turismos, motocicletas e autobuses, e de noventa a oitenta para camións e furgonetas. Só hai unha excepción a esta norma, e afecta as estradas convencionais que si teñan mediana de separación entre os dous carrís. Neste caso, os seus titulares poden optar por reducir a velocidade a noventa quilómetros por hora ou mantela no límite anterior, a cen. Nos límites previos á nova norma, a 120 quilómetros por hora, mantéñense tamén as autovías e autoestradas.
A limitación de velocidade nas estradas secundarias entrou en vigor a finais de xaneiro. Seis meses despois, Tráfico alertaba de que cada vez detecta máis incumprimentos en Galicia, e precisamente nese tipo de vías. Os estudos dos que dispón a DXT indican que o aumento de só un quilómetro por hora na velocidade media tradúcese nun incremento do 3 % na incidencia de accidentes con lesións, e dun 5 % na de accidentes con vítimas mortais.
Outras medidas previstas pola DXT para mellorar a seguridade están paralizadas pola inestabilidade política. Entre elas, o endurecemento das sancións por utilizar o móbil mentres se conduce ou a limitación da velocidade a 30 quilómetros por hora nos núcleos urbanos.
