As urbes galegas poden contratar entre 13 e 10 asesores
12 jun 2019 . Actualizado ás 05:00 h.Os alcaldes e concelleiros que tomarán posesión o sábado poderán cobrar a partir do 1 de xullo un 2,25 % máis que eles mesmos ou os seus compañeiros no anterior mandato. O incremento do PIB propicia esa alegría para os petos dos rexedores e edís que conten con salario municipal por ter atribuída unha dedicación exclusiva ou parcial no desempeño do seu cargo.
Os soldos están determinados polo número de habitantes de cada localidade. Para as de máis de medio millón de residentes establécese un salario máximo de 106.130 euros ao ano (4.000 máis do que cobraba ata agora Manuela Carmena). A escala vai baixando ata chegar aos 84.904 euros que poderán cobrar os rexedores e edís con dedicación plena en Vigo e A Coruña. Abel Caballero cobra agora, segundo o Ministerio de Facenda, 74.018 euros, e 39.999 o alcalde saínte da Coruña. No groso das cidades restantes, os salarios dos concelleiros poderán chegar a 79.598 euros ao ano; baixará como máximo a 68.985 en Ferrol, e a 58.372 en corporacións como Narón, Vilagarcía, Oleiros, Arteixo, Carballo, Cangas ou Lalín, é dicir, as que teñen entre 20.001 e 50.000 residentes. Descende a 53.065 euros para a franxa ata 10.000; a 47.759 nos censos de ata 5.000 veciños e sitúase en 42.452 para os que teñen máis de mil empadroados.
Os presidentes das deputacións poderán cobrar o mesmo que o alcalde do municipio máis poboado da súa provincia.
O acceso aos soldos de alcaldes e concelleiros dependerá en todo caso de que estes conten con dedicación completa ou parcial, que pode ser do 75, 50 ou 25 % da xornada semanal. De novo, as exclusividades repártense en función do volume de poboación. Chegan a 45 soldos íntegros no caso de Madrid (ten 57 edís), ou 32 en Barcelona. No referente a Galicia, A Coruña e Vigo poderán liberar a 18 dos seus 27 edís, cifra que non dá para que todos os concelleiros do goberno de Caballero, por exemplo, cobren do erario municipal, pero poderá contar coas dedicacións exclusivas que os seus concelleiros obteñan na Deputación, que sempre coinciden en número co da cidade máis poboada da provincia. Ata 15 liberados poderán ter as demais urbes. E só un poderá cobrar do Concello nas vilas de entre 1.001 e 2.000 veciños.
Para rematar, o persoal de confianza adscrito ás corporacións e que deben repartirse goberno e oposición varían entre a metade do número de edís da corporación para as cidades a un só nas vilas se non hai concelleiros liberados. As localidades de menos de 2.000 veciños non poden ter asesores pagos.