María José García, presidenta de FEFGA: «Teño pacientes indo a Portugal a por medicación»
GALICIA
Farmacias galegas alertan de que seguen perdendo viabilidade polos baixos prezos dos medicamentos
10 mares 2019 . Actualizado ás 05:00 h.A reforma da Lei de Ordenación Farmacéutica aprobada pola Xunta abre novas expectativas para as boticas galegas pero desde a Federación de Farmacias de Galicia (FEFGA), a súa presidenta María José García, sinala que o sector aínda pasa por un momento complicado, cos baixos prezos e o desabastecemento como principais cabalos de batalla.
-Ter unha farmacia é hoxe en día un bo negocio?
-Nunca foi o «choio» que algúns crían pero o certo é que a rendibilidade baixou moitísimo. Por unha banda, en Galicia temos o maior cociente de farmacias por habitante de Europa e aínda se pretenden abrir máis, algo que para nós non ten sentido. Por outro, baixouse moito o prezo dos medicamentos e reducíronllenos moito as marxes. E se non logramos ser rendibles periga o papel importantísimo que ten para a poboación o consello sanitario do farmacéutico. Hai moitas farmacias pasándoo realmente mal e vimos a moitas entrar en concurso de acredores nos últimos tempos.
-Din que a baixada de prezo tamén está a xerar problemas para os pacientes.
-Aquí xa tiñamos os prezos de medicamentos máis baixos da Unión Europea e en xaneiro volveron baixar. Iso fai que aos laboratorios non lles compense vender os seus medicamentos en España e prefiran facelo noutros países, provocando desabastecemento nas nosas farmacias. Eu teño pacientes que han ir a Portugal a comprar medicamentos como o Adiro porque aquí non tiñamos existencias. Nós vendémolo a pouco máis dun euro e alí custa catro veces máis.
-Cales son os puntos máis positivos da nova lei da Xunta?
-A posibilidade de que as farmacias abran boticas en poboacións próximas que non teñan ese servizo era unha vella reivindicación nosa. Permitirá chegar a todo o territorio pero facilitando que eses dispensarios sexan viables. A regulación das entregas a domicilio e da venda por Internet tamén son importantes e a prohibición de facer agasallos paréceme moi positiva. A xente ten que ir a unha farmacia polo seu trato profesional non porque dea agasallos.
-Que lles parece ter subido a 15 anos o prazo para poder traspasar unha farmacia?
-Nós sabiamos que o prazo de só tres anos daba lugar á especulación. Había que aumentalo pero quince é un pouco excesivo. Que pasa se as cousas non che van ben ou simplemente tes que trasladarche a outra comunidade? Con dez anos tería sido suficiente.
-Reclaman tamén menos trabas para ofrecer servizos como a confección de dietas.
-Tal e como se presentou, a lei esíxenos que para dar servizos de nutrición, óptica, ortopedia ou analíticas, o titular da farmacia teña que formarse nesas disciplinas. Nós pedimos que abonde con contratar a un titulado nesas ramas. Iso favorecería especialmente á contorna rural xa que desde a botica poderiamos atender todas esas necesidades e sempre baixo a supervisión dun profesional.