A poboación, explica Sueiro, presidente da Asociación Galega de Medicina Familiar, fai un uso racional do sistema, pero a cronicidad desborda os servizos
13 ene 2018 . Actualizado ás 05:00 h.Cada inverno, usuarios, sindicatos, políticos e xornalistas acórdanse das urxencias hospitalarias. Pero os niveis asistenciais de atención primaria tamén están desbordados cando chega a gripe, lembra o presidente da Asociación Galega de Medicina Familiar, Jesús Sueiro, o que demostra que os usuarios fan un uso racional da sanidade e acoden en primeira instancia a este nivel asistencial.
-Acoden os enfermos aos centros de saúde?
-Si, estamos a ver todos os días como os centros de saúde están desbordados por persoas que acoden por gripe e outras patoloxías. O problema non é a gripe en si, que é a de todos os anos, senón o volume de pacientes crónicos que atendemos, e que se multiplicou nos últimos anos. Son estes os que se desestabilizan en situacións de infeccións respiratorias e os que desbordan o sistema. A Administración parece que sempre está preocupada polos hospitais, e a primaria sempre está á cola das prioridades. Centros de saúde e puntos de atención continuada (PAC) tamén están desbordados.
-É dicir, que se fai un uso racional do sistema.
-Si, a información que recibo dos meus compañeiros é tremenda. As consultas de hospital poden xerar lista de espera, pero en primaria non. Temos a compañeiros vendo a 50 ou 70 pacientes diarios, non hai cobertura para substitutos ou mala planificación, os contratos fanse de xeito salteada e hai usuarios que acoden tres veces polo mesmo problema e venos tres médicos diferentes, e así non funciona.
-Cal é o perfil do enfermo de gripe que vai á consulta?
-A gripe afecta a todo o mundo. Cal é a diferenza? Que unha persoa de 30 ou 35 anos vén descartar complicacións e a pedir unha baixa de tres días por febre ou un xustificante. Pero despois temos o paciente diabético, cardiópata ou broncópata, que é máis frecuente e vén cun mal estado xeral.
-E varias veces por un mesmo proceso.
-É que hai que ter en conta, e iso é algo que eu explico aos broncópatas e mesmo a algún fumador, aínda que non teña afectación pulmonar, que se unha infección respiratoria a min ou a ti nos dura cinco ou sete días, a eles dúralles 15 ou 20. E desespéranse, claro, pero é o que ocorre coas infeccións en pacientes cunha inflamación crónica. Os diabéticos, por exemplo, teñen o sistema inmunológico un pouco alterado pola diabetes, polo que é máis doado que teñan complicacións, e aínda que a gripe é vírica estas complicacións poden ser bacterianas, esixir antibiótico, e a estas persoas é ás que temos que ver varias veces.
-Está sendo a gripe máis agresiva que outros invernos?
-Talvez está a ser máis forte, porque, polo menos polo que din os epidemiólogos, está circulando un virus non previsto no calendario vacunal e poida que leste collendo á poboación con menos defensas. Dun ano a outro sempre hai pequenas mutacións, pero son pequenas, polo que aínda que a persoa non estea protexida do todo pode ter defensas, mentres que con cambios máis bruscos cóllenos desprotexidos. Non é que a gripe deste inverno sexa máis forte, pero talvez o noso organismo está máis desprotexido fronte aos cambios.