Aberto o prazo para apuntarse nunha nova edición do proxecto impulsado pola Xunta, o Consorcio Zona Franca de Vigo e a Fundación Incyde, que pretende apoiar ata corenta empresas vinculadas á automoción e crear 120 empregos
19 oct 2021 . Actualizado ás 05:00 h.A incubadora High Tech Auto de Galicia comeza a apurar a súa velocidade de cruceiro coa recente convocatoria da súa terceira edición. A aceleradora especializada no sector da automoción púxose en marcha para favorecer a transferencia de tecnoloxía ao tecido empresarial do sector da automoción, o das empresas auxiliares de compoñentes e os servizos avanzados para esta industria a través da transferencia de tecnoloxía.
O proxecto para converter en realidade ideas e iniciativas non xerminadas e integralas na industria do automóbil conta co respaldo da Xunta, a través do Instituto Galego de Promoción Económica (Igape); o Consorcio Zona Franca de Vigo; e a Fundación Incyde, e desde principios deste mes e ata o 3 de decembro mantén aberto o prazo para apuntarse nunha nova convocatoria cuxo obxectivo é completar a cadea de valor da automoción en Galicia e contribuír a identificar, captar e reter o talento. Na súa presentación, en Vigo, o conselleiro Francisco Conde sinalou que High Tech Auto é a primeira incubadora de alta tecnoloxía de Galicia para o fomento da innovación e a transferencia da tecnoloxía a micropymes do sector e a industria auxiliar.
23 proxectos que xa avanzan
Con respecto a anteriores convocatorias, o departamento autonómico pon en valor os progresos acadados ata o momento, tras lograr que dez proxectos estean xa en fase de academia tras saír da primeira edición; e 13 iniciativas atópense na fase de incubación como consecuencia da segunda. En total, agárdase acabar apoiando a irrupción de ata corenta empresas e a creación de 120 postos de traballo. O investimento público ascende a 1,9 millóns de euros.
?Entre os proxectos que xa están en diferentes momentos de madurez e os que se incorporen á terceira edición agárdase, entre outras cuestións, poder definir a mobilidade do futuro, que presenta varios retos como son garantir que son sostibles ambientalmente para conseguir cero emisións; a dixitalización, para avanzar no desenvolvemento do vehículo eléctrico, intelixente e autónomo; e a seguridade. «Son aspectos que nestes momentos necesitan respostas e seguir avanzando para dar esas solucións tecnolóxicas e innovadoras para que Galicia poida seguir na vangarda do sector da automoción», asegurou Conde na presentación, na que estivo acompañado por representantes das institucións que colaboran directamente na incubadora, así como de universidades e colectivos económicos interesados na súa consolidación. Desde o departamento económico da Xunta considérase clave continuar pola senda do traballo conxunto para garantir o futuro dun dos sectores que acadaron a etiqueta de prioritarios para o Goberno galego á hora de valorar a repartición de fondos europeos. Así, a Vicepresidencia segunda insiste en reclamar a inclusión da iniciativa AutoAncora (impulsada por Stellantis , a industria auxiliar de compoñentes e o centro tecnolóxico CTAG, co apoio da Xunta) como unha das que deben recibir o respaldo segundo os criterios que estableza o Goberno.
Tres fases
A aceleradora de proxectos prevé tres fases. A primeira é a preincubación, na que se traballa con iniciativas empresariais que están nunha fase moi incipiente. Nese primeiro momento pondéranse as ideas e tecnoloxías que necesiten constatar a súa viabilidade e encaixe no sector de automoción. O segundo paso é propiamente o de incubación , orientado a construír o modelo de negocio para facilitar as condicións necesarias para ser comercializables e saír ao mercado. Ao finalizar esta fase, se os promotores e o comité de selección estímano oportuno, os proxectos oriéntanse ao programa Business Factory Auto. Para rematar, na posincubación, búscase a madurez das iniciativas para ser acelerados durante un tempo limitado (12 meses) na propia incubadora, co fin de enfocalos definitivamente a competir como empresas.
?En total, a duración prevista para o desenvolvemento de todas as actividades contempladas na incubadora ascende a 12 meses, e outros 12 meses de pos-incubación. Un comité técnico é o que se encarga de facer o filtro inicial para definir aquelas iniciativas que se van incorporar ao programa.