O único conxunto que non empregou ningunha fichaxe nas súas dous primeiros onces suma catro puntos na súa reaparición en Preferente 17 anos despois
15 sep 2025 . Actualizado á 20:32 h.Caneda e Xan, do Arzúa; Facal, desde o Puebla; Gándara, do Castriz; e o porteiro Santi Albarrán, chegado do Compostela xuvenil. Case a metade da aliñación que presentou ante o Burela o Dubra eran fichaxes chamadas a ofrecer un salto de nivel a un equipo xa de seu sobrado de experiencia en Preferente. Mentres, o cadro mariñán conquistou o Juan Baleato cunha aliñación que podería empregar o pasado curso en calquera encontro de Primeira Futgal: Kiko; Yeray, Veiga, Celes, Penelo; Vila, Jairo López; David Ben, Huguito, Diego Chao; e Jairo Campo.
O equipo dirixido por José Manuel Arca, Oke, asaltou a zona de privilexio na Preferente con catro puntos nas dúas primeiras xornadas desde unha confianza total no bloque que o pasado curso arrasou na Primeira Futgal. Só dous reforzos —Deonildo, do San Ciprián; e Xoel Ferro, do Lugo xuvenil— contaron con minutos no único equipo da liga que non necesitou ningunha fichaxe para completar as súas dúas primeiras aliñacións da tempada.
A fidelidade do persoal ao club da Marosa é tal que incluso catro futbolistas formaron parte do equipo que no 2017-18 conseguiu escapar da Segundo Futgal. Jairo Campo e Javi Celes xa tiñan un rol capital nun vestiario onde tamén estaba Deonildo e no que gañaba presenza o aínda xuvenil Vila. Diego Lozano e Manu Armesto son os últimos canteiráns, por agora, en seguir uns pasos que tamén deron Penelo, Yeray, Yago Ramos, Iván Maseda, Adri Kun e David Ben.
Outro dos veteranos e locais do persoal, Miguel Gomes, atesoura unha longa traxectoria na entidade, aínda que viu desde o Ribadeo a caída e resurrección desde Segundo Futgal da escuadra verde. Antón Camiña, Kiko e Jairo López xa superan o lustro nunha entidade que introduciu no seu grupo aos tamén viveirenses Huguito, Veiga e Diego Chao (na súa segunda etapa en Burela) no 2023.
Con esas vimbias regresou a Preferente tras 17 anos, igualou 1-1 ao Sigüeiro, venceu 1-2 ao Dubra e xa apunta ao San Tirso este domingo na Marosa.