Así encara o final de curso o fútbol galego: o Compostela necesita gañar e agardar unha picada do Escobedo

No grupo primeiro da Segunda Federación, xa case todos os billetes están vendidos. O Pontevedra confirmou o seu retorno á categoría superior cun brillante título. Numancia, Avilés e o Ávila aseguraron o seu posto no play off. Falta a cuarta praza, que ten ao alcance da man o Fabril. Na zona de abaixo, tres dos cinco descensos teñen nome propio: Ximnástica, Guijuelo e Laredo.

As outras dúas posicións de descenso están ocupadas por Llanera e Compos, empatados a puntos. Ningún pode acadar a permanencia matemática, pero si optan a defender a tempada no play out, o seu último salvavidas. Este lugar está ocupado polo Escobedo, con dous puntos de vantaxe. O Coruxo, mentres, xa se salvou do descenso, pero aínda lle falta confirmar a permanencia evitando o play out.

«PLAY OUT»

Un milagre en San Lázaro

O Compos non pode acadar a permanencia matemática, pero aínda agarda un milagre para conseguir a praza de play out e xogarse o futuro a unha soa carta. Para evitar o descenso directo, o colectivo da capital galega ten que superar en San Lázaro ao Valladolid Promesas e agardar unha picada do Escobedo, que recibe no seu campo ao Llanera, un rival que necesita os tres puntos para intentar o mesmo obxectivo que os santiagueses. Ao Escobedo, con mellor gol average que o Compos, abóndalle un empate para evitar o descenso inmediato.

«PLAY OFF»

O Fabril necesita un punto

Ao Fabril chégalle cun empate en Abegondo ante o Ximnástica de Torrelavega, equipo que xa descendeu á Terceira Federación. O filial, incluso, pode chegar ao play off como cuarto clasificado se logra gañar e o Real Ávila non supera a domicilio ao Numancia, que xa ten asegurado o segundo posto. Á cuarta praza do play off tamén aspiran Langreo e Raio Cantabria, aínda que ambos teñen moitas menos opcións. As súas posibilidades pasan pola derrota do Fabril.

O Coruxo, que visita ao descendido Guijuelo, podería salvarse cun punto

As contas do Coruxo para permanecer na Segunda RFEF sen pasar polo play out (xa ten eludido o descenso directo) son sinxelas: ao equipo de Javi Pereira chégalle con sumar un punto na súa visita ao descendido Guijuelo ou que o Escobedo, que agora ocupa o posto de promoción de permanencia, non lle gañe ao Llanera, que tamén xoga a vida.

Os de Ou Vao chegan á última cita con 42 puntos, os mesmos que o Mariño, e con dous de marxe sobre o Escobedo, ao que lle teñen a gol average gañada. En caso de darse un empate a 43 puntos (empate do Coruxo e triunfo dos cántabros), sería o Escobedo o descendido, historia que se repite nun teórico triplo empate co Mariño, xa que nos seis duelos directos o cadro astur sumou cinco puntos, igual que os verdes, e o Escobedo só fixo tres.

O único risco é un triunfo do Escobedo e derrota do Coruxo, con ou sen revés do Marino. Só nese caso descendería.

A Terceira encara unha penúltima xornada que pode decidilo todo, ou pospor ata o final moitas cousas importantes

A liga de Terceira RFEF vive esta fin de semana a súa penúltima xornada. Faio con seis equipos implicados na loita polas prazas e a orde de xogo da promoción de ascenso e oito pelexando por evitar acompañar ao Betanzos no descenso. O que pase entre mañá e o domingo podería deixalo practicamente todo resolto, ou dar paso a unha xornada final de infarto. Así se presentan os nove partidos da penúltima folla do calendario.

Alondras-Atlético Arteixo

O equipo local, sexto con 50 puntos, necesita gañar para xogarse a próxima semana co Arousa a domicilio o último billete á fase. O seu rival, décimo cuarto con 34 puntos, pelexará por un triunfo que lle daría a salvación se caen dúas dos tres equipos que o suceden na táboa, Valladares (34 puntos), Barbadás (33) e Vilalonga (33).

Silva-Arousa

Undécimo con 38 puntos, un empate poderíalle dar mañá a salvación ao Silva. Claro que o Arousa está obrigado a gañar para, como mínimo, xogarlla o último día co Alondras na casa ou, incluso, celebrar a praza na promoción se esta non suma mañá de 3.

Estradense-Valladares

O anfitrión é por agora o único clasificado para a fase, pero con 57 puntos, busca amarrar o subcampeonato para obter o factor campo nas dúas primeiras das tres roldas cara á Segunda RFEF. O Valladares podería mañá desde caer a postos de descenso a cantar a permanencia.

Viveiro-Betanzos

Décimo terceiro con 36 puntos, o cadro da Mariña arrinca a xornada case como o Valladares ante un Betanzos descendido, pero que onte goleou 0-3 ao Vilalonga en partido aprazado.

Noia-Polvoreira

O Noia é sétimo con 49 puntos e aínda podería ir á fase sumando os últimos 6 puntos se en paralelo a pifian o Alondras e Arousa. O domingo xogará cunha Polvoreira oitava sen nada en xogo.

Gran Peña-Vilalonga

Duodécimo con 37 puntos fronte ao penúltimo con 33. O Gran Peña pode amarrar a salvación o domingo e o segundo está obrigado a evitar certificar o seu descenso.

Somozas-Boiro

Cos locais salvados con 40 puntos, o Boiro está a tiro dun triunfo para asegurar a categoría sen depender de terceiros.

Sarriá-VDE Ourense e Racing Vilalbés-Barbadás

A Sarriá e o Racing Vilalbés, con 56 puntos, aspiran a desbancar do segundo posto ao Estradense, con 57, recibindo o domingo ao campión e ascendido VDE Ourense e fronte a un Barbadás xogándose xa a vida na Terceira.

---

---

---