Caos en Pontedeume e Cabanas polas obras: «E se tivesen que pasar os bombeiros ou unha ambulancia?»

Ninguén quere revivir o caos do martes na ponche de Pedra. Comezaron as catas previas á execución das obras para ampliar a ponte e a empresa montou semáforos para regular o tráfico. Manuel, veciño de Monfero , regresaba a casa desde Ferrol pouco antes de únaa e media da tarde: «Eu só estiven 18 minutos no atasco, pero un amigo que viña da Coruña xa tivo que parar á altura do cuartel da Garda Civil, en Vilar». Noelia, veciña de Cabanas cun negocio en Pontedeume , tivo que agardar 50 minutos a que chegase a súa filla á parada do bus escolar que partiu en hora do CEIP Eladia Mariño: «Vén ás 15.35, e eran as 16.20 cando apareceu».

E iso que o autocar, como precisa esta nai, nin sequera tivo que achegarse á ponte. «A xente tardou hora e media en cruzar de Laraxe (Cabanas) a Campolongo (Pontedeume)», apunta un condutor, aínda indignado. «Terán que habilitar algo, a xente así non pode estar, xa non digo un ano...», remarca Noelia, que alerta das consecuencias que podería traer para o comercio local, «que vive moito da xente de Cabanas ou Miño».

A situación mellorou onte, coa presenza de señalistas , persoal encargado de informar, sinalizar, dirixir e controlar a circulación no ámbito dunha obra. O martes activáronse os semáforos, instalados ao comezo e ao final do tramo do carril cortado, o que xerou problemas nas dúas rotondas de Pontedeume e a de Cabanas. Nin buses nin camións podían virar, o que agravou o atasco. «E se tivesen que pasar os bombeiros ou unha ambulancia?», preguntábanse algúns. A Policía Local eumesa traballou durante máis de seis horas seguidas para mitigar o caos circulatorio.

«En Pontedeume colapsáronse moitas vías, Ricardo Sánchez, parte de Lombardero, a avenida de Rajoy... non só a estrada nacional», repetía onte o alcalde, Bernardo Fernández, que hoxe acudirá, xunto ao seu homólogo de Cabanas, Fernando Couce, a unha reunión coa Demarcación de Estradas e representantes da empresa adxudicataria da obra para analizar a situación. «Trasladarémoslles o estudo do ocorrido o martes co tráfico. E imos pedirlles o mesmo no que xa lles insistimos na reunión na que nos presentaron o proxecto, que se traballe exclusivamente pola noite, que todo o que se poida fágase pola noite», indicou.

Os usuarios esixen «alternativas» para evitar que se repita o sucedido o martes. «Houbo colas de dúas horas, equivócanse, que fagan unha ponte nova e deixen esta peonil e como carril bici [...], ou que polo menos liberen a autopista entre Ferrol e Miño», expuña un condutor onte. O alcalde eumés sostén que coa gratuidade das peaxes —que defende «de forma definitiva, non só durante a obra»—, «non se arranxaría nada e trasladaríase o problema á saída da AP-9».

---

---

---