A retirada do amianto finalizou e a derriba do edificio aprázase ata o día 15
05 abr 2023 . Actualizado á 23:51 h.O bloque das coñecidas como vivendas dos mestres máis próximo ao CEIP José María Lage xa non ten tellado. Esta semana, unha empresa especializada na retirada de fibrocemento e a xestión do amianto deixou o inmoble sen teitume, baixo supervisión dos técnicos da Xunta de Galicia. Onte estaba previsto que se executasen os traballos de demolición do inmoble erixido en 1975, pero unha avaría na plataforma que debía transportar a maquinaria ata Ortigueira obrigou a aprazalo.
«Está previsto facelo o día 15, un sábado, para que non sexa unha xornada lectiva e non haxa ningún tipo de risco para os nenos do colexio», explicou o alcalde, Juan Penabad Muras. Por iso elíxese a Semana Santa para a retirada da uralita. As obras obrigaron a desviar o tráfico cara ao centro de saúde, igual que ocorrerá o día 15, «pero ao non ser laborable é máis doado», apunta o mandatario local.
Coa derriba deste inmoble, cuxo custo rolda os 90.000 euros, financiados con fondos municipais, liberarase unha ampla superficie xunto ao centro educativo, que se destinará a zona verde, beirarrúas e un espazo máis amplo para facilitar as manobras do transporte escolar. «Favorecerá a seguridade da veciñanza, sobre todo do alumnado, e ao mesmo tempo acabamos cun feísmo na vila», destaca o rexedor.
Sobre os outros dous bloques, situados xusto no outro lado da rúa, o Concello solicitou unha valoración «para ver cal é o grao de deterioro e se paga a pena rehabilitalos», indicou Muras. Ve improbable esta opción, polo custo que suporía dado a deterioración que presentan os edificios, o tipo de materiais ou o incumprimento da normativa de eficiencia enerxética.