Moda Re- conta xa con cinco tendas na provincia e abrirá unha máis no Odeón de Narón

O que naceu como un proxecto para dignificar a entrega social da roupa doada ás parroquias e promover a inserción laboral de persoas en situación ou risco de exclusión converteuse nun auténtico xigante da reciclaxe téxtil. Chámase Moda Re- e trátase dunha cooperativa social promovida por Cáritas que move 44.000 toneladas de roupa usada ao ano e xera 1.400 empregos inclusivos a través da recollida, reutilización, reciclaxe, doazón e venda.

En Galicia, como no resto de España, este proxecto non deixou de crecer nos últimos anos. A primeira tenda galega de Moda Re- abriu as súas portas na rúa Casas Reais de Santiago no 2016. E desde entón á cadea de roupa usada de Cáritas sumáronse outros nove puntos de venda na comunidade autónoma, dos cales catro están situados na provincia coruñesa: no 65 da rúa Barcelona da cidade herculina, no 51 da avenida do Balneario de Arteixo, no 1 da praza de Galicia de Carballo e no Alcampo de Ferrol, onde a marca conta cun córner. Ademais, Moda Re- opera con tres tendas en Vigo (unha delas no centro comercial Vialia), unha en Ourense e outra máis en Pontevedra. E para o 2025 marcouse o reto de continuar a súa expansión con dous novos espazos: un no centro comercial Odeón de Narón, que funcionará no primeiro piso e previsiblemente abrirá as súas portas a primeira semana de marzo, e outro en Vilagarcía, para o cal se está buscando localización e cuxa apertura está prevista para o próximo mes de setembro.

O proxecto de Moda Re- en Galicia lévase a cabo a través de dúas empresas de inserción: Arroupa e Servizos Comerciais de Inserción (SCI). A primeira, en colaboración coa Diocese de Santiago, ocúpase da xestión das tendas de Pontevedra, Arteixo, Carballo, A Coruña, Santiago e a futura de Vilagarcía, mentres que SCI, nun man a man coas Dioceses de Tui-Vigo, Ourense e Mondoñedo-Ferrol, comanda os puntos de venda que funcionan en Vigo, Ferrol, Ourense e o que abrirá no centro comercial Odeón de Narón.

A recollida de roupa realízase a través dos colectores que Cáritas ten repartidos por todo o territorio galego, para enviala despois á planta de clasificación, almacenaxe e tratamento de Madrid (o proxecto conta con outras tres plantas en Barcelona, Bilbao e Valencia), onde, segundo o seu estado, desinféctase para destinala ao circuíto de venda das tendas de Moda Re- ou recíclase para obter outro tipo de produtos, como fío para a industria téxtil. «Na nave de Arroupa en Santiago facemos unha preselección previa, así que non necesitamos enviar toda a roupa a Madrid e dentro de moi pouco tampouco o terá que facer ningunha das de Cáritas de Galicia, xa que imos construír unha planta de tratamento integral no polígono do Tambre, en Santiago, cunha capacidade media de tratamento de 5.000 toneladas de roupa ao ano e unha capacidade máxima de 10.000», avanza Isabel Fraga, xerente da empresa de inserción que colabora coa diocese compostela.

Pola súa banda, María Luz Jorge, responsable de Servizos Comerciais de Inserción, lembra que Moda Re- «é un proxecto sen ánimo de lucro», que naceu coa finalidade de xerar emprego para persoas en situación vulnerable ou exclusión social, polo que todos os beneficios que se obteñen pola venda da roupa na súa rede de tendas reverten nesta iniciativa de carácter solidario e utilízase para pagar o salario dos traballadores, os custos que xera a recollida dos téxtiles e o seu tratamento, así como o alugueiro dos locais.

Contratos de tres anos

Ás persoas que acceden a un posto de traballo a través de Moda Re- fáiselles un contrato de inserción que non pode durar máis de tres anos, pero durante ese tempo, advirte Mari Luz Jorge, o proxecto ofrécelles formación, asesoramento e ferramentas para que, unha vez finalice ese período, poidan integrarse no mercado laboral ordinario. «Agora mesmo, por exemplo, un dos traballadores que se encarga da recollida de roupa está a se sacar o carné de camioneiro para dedicarse a ese sector cando cumpra os tres anos de contrato», anota a xerente de SCI a modo de exemplo. Actualmente, máis de corenta persoas en risco de exclusión de toda Galicia están a traballar grazas aos contratos de inserción de Moda Re-.

A nova planta de tratamento do polígono do Tambre xerará quince postos de traballo 

O proxecto de Arroupa para abrir unha nova planta de tratamento de residuos téxtiles no polígono do Tambre (Santiago) avanza con paso firme. A empresa de inserción nada da man do proxecto Moda Re- de Cáritas conta xa cunha nave de clasificación na rúa Isaac Peral dese polígono compostelán, pero adquiriu outros terreos na mesma área industrial para construír unha nova nave e trasladar alí a súa actividade.

A conselleira delegada de Arroupa, Pilar Farjas, xa adiantou antes do verán a necesidade de cambiar as actuais instalacións por unhas de maior capacidade, e nos últimos meses pechouse a adquisición do terreo, de 4.500 metros cadrados, e traballouse nos trámites administrativos e urbanísticos. A xerente, Isabel Fraga, explica que Arroupa xa conta coa licenza e adianta que as obras darán comezo proximamente, coa previsión de que a planta estea operativa a finais deste ano.

A súa posta en marcha suporá un grande aforro en transporte, xa que se poderá tratar en Galicia toda a roupa que agora se envía á planta de Madrid. E ademais, xerará uns 15 novos contratos de inserción, segundo adianta a xerente de Arroupa.

Pezas que se entregan con códigos QR ou véndense a prezos súpers reducidos 

As tendas do proxecto Moda Re- están abertas ao público xeral, que pode adquirir as pezas a prezos reducidos. Pero, ademais, estes establecementos encárganse de levar a cabo a entrega social da roupa doada ás persoas sen recursos, mediante un código QR que é como un vale por unha contía determinada, que varía en función das necesidades de cada caso. «Desta forma, o que se persegue é dignificar a entrega social», advirte Marta Pazo, coordinadora de Cáritas en Ferrol.

---

---

---