Gloria e caída da Casa de Vila, con 30 cuartos devorados polo lume: «Grazas a deus, sen danos persoais»
MUGARDOS
O seu dono xa presentou unha denuncia e agradece á Garda Civil, Policía Local e GES de Mugardos «a súa rápida actuación para salvar o inmoble», alzado en 1910 polo emprendedor Jerónimo Vila
28 may 2025 . Actualizado á 04:29 h.Na Belle Époque, antes de que as guerras do século XX arrasasen Europa, construíuse a Casa de Vila. Desde a súa creación en 1910 grazas ao emprendedor Jerónimo Vila ata este martes, brillaba como un diamante asomado á ría de Ferrol. Era un dos emblemas arquitectónicos de Mugardos, e unha das casas habitadas de maior antigüidade. Pero desde onte converteuse en cinzas, tras un incendio de orixe descoñecida que afectou considerablemente a este inmoble dotado con 30 cuartos (entre dormitorios e salitas).
O dono desta mansión de tres alturas, Pedro Cortizas, lanza a seguinte mensaxe: «Só podemos dar grazas a deus por non ter que lamentar ningún dano persoal, os danos limitáronse ao prexuízo patrimonial». Aínda que se descoñece a orixe do sinistro, o propietario xa presentou a denuncia correspondente.
«Cónstame que a Garda Civil está a realizar as investigacións oportunas; desexo agradecer á Garda Civil, Policía Local e GES de Mugardos a súa rápida actuación que permitiu salvar o inmoble».
Asegura que «non nos consta que a vivenda fose okupada, de feito utilizámola con certa frecuencia».
O dono recalca que «non estaba en situación de ruína e si en condicións de uso con todos os servizos necesarios, pero grazas a deus no momento do incendio non estaba a ser utilizada».
Fran Vila, o neto do práctico que construíu esta mansión, indica que «o meu avó era de Maniños (Fene) e en Mugardos creou unha das casas con máis historia, ao lado do seu estaleiro». Nese Estaleiro Vila, Jerónimo lanzou ao mundo as famosas lanchas de Mugardos para cruzar a ría. E parte da leira foi expropiada pola Mariña para facer un centro de calibración magnética de barcos.
Jerónimo Vila, propietario do estaleiro que levaba o seu nome, tivo tres fillas e morreu aos 96 anos. Antes gozou desta mansión con miradoiro sobre a ría, na que instalou tres cuartos de baño (algo inaudito para a época): «Era unha das casas máis potentes que había en Mugardos». Hai dúas décadas pasou a mans dos actuais donos, que agora loitarán para devolverlle o esplendor previo ao incendio.