O pontés Xosé María López, gañador do certame de relatos da Deputación cun texto sobre o mosteiro de Monfero

Xosé María López Fernández (As Pontes, 1980) é o gañador da décimo terceira edición do concurso #hoxeescriboen, de relatos para viaxar polos concellos da provincia da Coruña, convocado pola Deputación. O fío do tempo é o texto premiado (entre máis de cen), ambientado no mosteiro de Monfero.

O xurado destacou «a intensidade literaria e a capacidade de mergullar ao lector nun ambiente sobrecolledor, que recrea o lugar como un espazo maldito, cunha linguaxe poderosa, descricións líricas e unha estrutura narrativa que se mantén ata o final».

O autor deu as grazas, nas súas redes sociais, á Biblioteca da Deputación por este galardón e explicou que Monfero é o lugar de orixe dunha parte dos seus devanceiros. «A Cela foi un escenario presente na miña nenez e adolescencia. Mais o motivo principal da elección do mosteiro foi visibilizar o seu lamentable estado de conservación», engadiu. Documentalista e técnico en xestión do patrimonio cultural, debutou este ano como novelista, con Terror Mortis.

---

---

---