Steffany's Bag, os bolsos de factura ferrolá que traspasan fronteiras: «Non me agardaba que tivesen tanto éxito»
FERROL CIUDAD
Fanny Vázquez triunfa con deseños propios e réplicas de modelos icónicos como o Kelly ou o Birkin, feitos cento por cento a man con coiro de Italia, Ubrique e Galicia
24 may 2024 . Actualizado á 09:41 h.Fanny Vázquez (Ferrol, 53 anos) considérase unha muller «inqueda» e non hai máis que facer un percorrido pola súa traxectoria profesional para comprobar que o adxectivo lle vai como anel ao dedo. Estudou Maxisterio e Psicopedagoxía, traballou como mestra, tamén no sector inmobiliario, montou unha empresa de seguridade e reformas.. E finalmente atopou a súa vocación na artesanía do coiro, na que creceu de forma autodidacta e frutificou hai agora un ano coa creación da súa propia marca, Steffany's Bag, coa que triunfa grazas a unha fórmula infalible: «Son bolsos de coiro cento por cento artesanais, nos que absolutamente todo está feito a man, desde o corte ata o tintado e o cosido, e ademais son moi femininos», anota a artesá, que vende as súas creacións na zapatería Miguel da rúa María, onde tamén traballa reparando e «tuneando» este tipo de artigos. «El animoume e axudoume a pór en marcha este proxecto, foi quen elixiu o nome da marca e tamén deseñou o logo», comenta con agradecemento cara ao dono da zapatería, Miguel Pérez.
A súa aventura emprendedora comezou hai pouco menos dun ano. «Fíxenme un bolso para min e colgueino no Instagram da zapatería para ver a reacción da xente. A resposta foi incrible. Empezaron a chegar moitísimas mensaxes e de sitios tan afastados como Colombia, Nova York ou Suíza. A xente preguntaba cantos custaban e tivemos que retirar a publicación porque foi algo que nos desbordou», rememora Fanny.
Pero esa «proba do algodón» serviulle para comprobar que o seu produto espertaba interese e tiña boa aceptación. E foi así como a artesá se lanzou á venda das súas creacións, «pero a moi pequena escala, porque eu soa non dou abasto». «Só fago dez unidades de cada modelo, porque me gustan que sexan exclusivo e porque se non creo que me aburriría. Gústame moito variar e buscar novas idea para os deseños», explica a artesá, que elabora os seus bolsos con coiro procedente de curtidores de Italia, Ubrique e Tarambollo (Carballo).
Ver esta publicación en Instagram
Entre os seus «best sellers» atópanse bolsos que son réplicas de modelos icónicos como o Kelly e o Birkin de Hermès ou a Tote Bag de Marc Jacobs, pero tamén deseños propios como o Cube, o Circle ou o Moon. «A verdade é que non me agardaba que tivesen tanto éxito; entre a clientela hai moita xente de Ferrol, pero tamén turistas que visitan a cidade e lévanos de volta con eles a París, Nova York, Italia, Roma, San Petersburgo... Aos estranxeiros parécenlles moi baratos e dinme que nos seus países custarían máis do dobre ou o triplo», explica Fanny, que vende as súas creacións a prezos que oscilan entre os 165 e os 280 euros.
Conta que ás súas clientas lles gusta que os bolsos non leven forro, «para que se vexa que son de coiro de verdade», e aprecian ademais que os peches sexan de latón, «porque non rompen». Ademais de bolsos, Fanny tamén fabrica en coiro axendas personalizadas, fundas de móbiles ou correas de reloxo. E como a súa mente non para nin un minuto, agora está cavilando na posibilidade de ampliar a oferta de Steffany's Bag con zapatos e sandalias de coiro feitas a man, como a ela gústanlle. Xa avisou ao principio de que era moi inqueda. «Quen sabe? Se cadra dentro duns anos dáme polos fogóns e xubílome como cociñeira», di entre risos antes da despedida.