Paseo do líder do PP polo centro e mitins de PSOE e BNG
10 feb 2024 . Actualizado ás 05:00 h.Xornada de alta voltaxe política mañá en Ferrol. Os tres partidos con representación no actual Parlamento galego desembarcan na cidade naval con primeiros espadas. O líder do PP a nivel estatal, Alberto Núñez Feijoo, ten na súa axenda un paseo polo centro da cidade e a zona do porto a partir de únaa da tarde deste domingo. Non se prevé a asistencia do candidato á reelección, Alfonso Rueda, pero si doutros representantes populares. Unha hora antes coincidirán á mesma hora os actos centrais de BNG e o PSOE en Ferrol. Ás doce, os socialistas teñen previsto un mitin coa intervención estrela do expresidente do Goberno José Luis Rodríguez Zapatero , que xa percorreu outras urbes galegas. Estará acompañado polo candidato á presidencia autonómica, José Ramón Gómez Besteiro, e o líder dos socialistas galegos, Valentín González Formoso, ademais do secretario xeral a nivel local, Anxo Mato. Celebrarase no Cantón, baixo a carpa que se monta desde onte sobre a praza da Constitución.
E a líder e candidata do BNG, Ana Pontón, encabezará o cartel do mitin que a formación nacionalista celebrará, tamén ás doce, no auditorio municipal, en Caranza. Onte o candidato comarcal Mon Fernández comprometeu en Asfedro a integrar na rede sanitaria pública os dispositivos de atención ás drogodependencias.
Pola súa banda, a candidata de Sumar, Marta Lois, visitará o luns Ferrol para reunirse co comité de empresa de Navantia.