As prazas xa se cubriron no momento en que se abriu o prazo
17 dic 2021 . Actualizado ás 05:00 h.O Concello de Ferrol continúa celebrando con éxito as visitas guiadas da primeira Semana de Patrimonio Invisible, que comezaron a desenvolverse o pasado día 15 e continuarán ata o domingo. As prazas xa están todas cubertas desde o mesmo momento que se abriu o prazo. As quendas das visitas na xornada de hoxe serán ás 11, 12, 13, 17, 18 e 19 horas, mentres que, mañá, domingo, repetiranse os mesmos horarios, suprimindo o das sete da tarde.
A iniciativa municipal consiste en abrir á cidadanía as portas de edificios ou monumentos que habitualmente permanecen pechados.
Segundo a información facilitada pola concelleira de Patrimonio Histórico, Eva Martínez Montero, nesta primeira edición están a abrirse ás visitas a estación naval da Graña, o Casino Ferrolán, a igrexa e cemiterio de San Salvador de Serantes, o Pazo do Monte, o arquivo intermedio Militar do Noroeste, o interior do Teatro Jofre, as antigas fábricas de Ferrol Vello e a propia Casa do Concello. Trátase de espazos cun valor patrimonial, histórico e cultural indiscutible.
A edila da área manifestou que a boa acollida desta primeira edición «reflicte que os ferroláns teñen moito interese por coñecer a fondo a historia e arquitectura da nosa cidade» e anunciou que xa se está traballando nunha nova proposta que repetirá as visitas aos espazos máis demandados e que incluirá outros novos.