Trescentos peregrinos completaron o tramo do Camiño Inglés entre Finchale e Durham
FERROL CIDADE
Galicia colocou o primeiro sinal oficial da ruta en territorio británico
23 mares 2019 . Actualizado ás 21:49 h.«Hoxe imos pór o primeiro sinal dunha ruta histórica que nos levará á Coruña e Ferrol primeiro, e a Santiago de Compostela despois». Con estas palabras invitaba o investigador das peregrinacións David Pott ao deputado provincial coruñés Antonio Leira a coller o martelo e colocar o sinal da frecha amarela en Finchale, comezo do Camiño Inglés. Dita abadía atópase no nordeste británico, a uns 2.450 quilómetros da praza do Obradoiro.
«Este é un día en que cumprimos un soño», manifestaba emocionado Antonio Leira, quen estaba acompañado polo alcalde de Dumbría, José Manuel Pequeno (que se pasou a xornada promocionando a Costa da Morte e a prolongación a Fisterra ), e a xefa de Turismo do ente provincial, Maite Loureiro. Na comitiva galega non faltaron frases de recordo e agradecemento para Rafael Sánchez, xerente do Xacobeo ata hai un mes e que polo tanto non acudiu á cita. A Deputación e o Xacobeo traballaron de xeito conxunto estes cinco últimos anos para reivindicar e promocionar esa ruta xacobea en chan británico. Unha ruta da que, como lembraba Penélope Johnson -que creceu en Ferrol e desde hai dous decenios é profesora da Universidade de Durham-, «aquí ninguén sabía nada ata que desde Galicia se apostou por recuperala».
Ante as case 300 persoas congregadas nas maxestosas ruínas, David Pott referiuse logo á importancia histórica da Coruña nas relacións con Gran Bretaña, e Antonio Leira lembrou aos presentes que esas relacións existiron tamén con Ferrol, contacto que mesmo se prolongou durante máis tempo.
A secretaria da asociación Friends of Finchale Camiño, a mencionada Penelope Johnson, explicou que a credencial do peregrino que se acababa de repartir minutos antes, financiada pola Deputación, estaba aceptada pola Igrexa compostelá. David Pott recalcou que así era posible peregrinar no tramo británico e logo facer o Camiño Inglés desde A Coruña: súmanse así máis dos cen quilómetros necesarios para conseguir a compostela. Houbo unha auténtica cola británica -respectuosa, paciente e silenciosa- para cuñar a credencial.
«Vémonos en Santiago»
Entre os asistentes, un moi numeroso grupo de estudantes de Corea do Sur e do Xapón. «Aquí en Durham hai unha universidade oriental, e somos alumnos dela -manifestou Yon Hye-, e para nós é unha oportunidade para coñecer de preto un fenómeno mundial como é a peregrinación a Santiago».
Tras as intervencións e a colocación do primeiro sinal, os tres centenares de persoas botaron a andar por cuarta vez neste século ata a catedral de Durham, patrimonio da humanidade, seguindo o trazado que percorrían os peregrinos no medievo e que está identificado na súa totalidade. No templo entraron tras o alcalde da cidade, e as autoridades eclesiásticas explicáronlles a historia e relevancia dunha catedral que ata a Reforma protestante acolleu a miles de peregrinos. Ao saír, a despedida era unánime: «O ano que vén vémonos en Santiago».