As súas intervencións en concellos da comarca resólvense de media nunha hora
08 feb 2019 . Actualizado ás 05:00 h.O balance anual do Consorcio Provincial contra Incendios e Salvamento da Coruña evidencia que os bombeiros de Ferrol son os máis rápidos da provincia, tanto no tempo transcorrido desde a chegada ao lugar da incidencia e a resolución da mesma, como no período desenvolvido desde que saen da base ata que regresan. O resumo refírese ás intervencións realizadas nos municipios de Ares, Cedeira, Fene, Mugardos, Neda e Valdoviño, que é nos que presta servizo a través do convenio co Consorcio Provincial e que o ano pasado sumaron 89. No entanto, a cifra de saídas do parque da Gándara a eses mesmos municipios foi sensiblemente maior, xa que se contabilizaron un total de 365, pero na maioría das ocasións o problema xa estaba resolto e tamén houbo algunhas falsas alarmas.
A maiores, e centrándose xa en Ferrol, onde os servizos de extinción de incendios e urxencias dependen directamente do concello e non do Consorcio Provincial, os bombeiros realizaron 2.357 intervencións na localidade ao longo do ano pasado.
En canto aos tempos empregados na asistencia ás urxencias na comarca, o balance do Consorcio Provincial recolle que os bombeiros de Ferrol son os primeiros en chegar ao lugar do incidente desde que reciben a chamada, cunha media de 16,67 minutos, só por detrás do Speis de Ribeira, que o fai en 13,67; Boiro, en 14 minutos, e o Arteixo, en 14,83. O maior tempo empregado corresponde ao Speis de Carballo, cunha media de 64 minutos, seguida dos bombeiros das Pontes, con 23,83; Ordes, con 22,25; Betanzos, con 20,92; Arzúa, con 20,25; Santa Comba, con 18 minutos; e Cee, con 16,83.
Polo que respecta ao tempo de intervención, que é o período comprendido desde a chegada ao lugar da urxencia e a resolución da mesma, os bombeiros ferroláns son os máis rápidos, porque empregan unha media de 24,42 minutos, fronte aos 32,17 do seu inmediato seguidor, o Speis de Arzúa e xa bastante afastados do das Pontes, cunha media de 47,42 minutos, segundo os datos facilitados polo Consorcio.
O mellor tempo en resolución
O balance do ano pasado recolle, así mesmo, a media do tempo de ocupación, tomada desde que os servizos de urxencias saen da súa base e regresan á mesma, estando dispoñibles para outra intervención. Os bombeiros de Ferrol volven rexistrar aquí o mellor tempo, con 57,25 minutos, seguidos do Speis de Arteixo, con 64,92; Carballo, con 66,17 minutos; Boiro, a 66,58; e o resto xa máis distanciados.
En canto á orixe das incidencias asistidas polo persoal do parque de bombeiros de Ferrol nos concellos da comarca, 30 corresponden a saídas anuladas por falsa alarma, once a incendios en vivendas, sete a accidentes de tráfico, seis a derrubamentos, outros seis a rescates de persoas, seis máis incendios en colectores, cinco a fugas de auga ou gas, tres a retirada de árbores, e o resto a intervencións varias.
Máis saídas a Fene
O canto á localización dos operativos, no termo municipal de Fene desenvolvéronse 30; en Valdoviño, 19; en Cedeira, 13; en Neda, 11; en Ares, outros 11; en Mugardos, tres; e fóra do seu ámbito de actuación, dúas máis.